সম্পাদকীয়, ৬ষ্ঠ বছৰৰ ৩য় সংখ্যা,

 সম্পাদকীয়

সাম্প্ৰতিক সময়ত ডিজিটেল মাধ্যম আমাৰ বাবে এক অপৰিহাৰ্য অংগ হৈ পৰিছে।সাহিত্য, সংস্কৃতি, শিক্ষা আদি সকলো ক্ষেত্ৰতে ডিজিটেল মাধ্যম অতিকৈ প্ৰয়োজনীয় হিচাপে বিবেচিত হৈছে । আলোচনীয়ে সদায়ে ছাত্ৰ-ছাত্ৰীৰ প্ৰতিভা প্ৰকাশ আৰু জ্ঞান আহৰণ কৰাৰ ক্ষেত্ৰত গুৰুত্বপূৰ্ণ ভূমিকা বহন কৰি আহিছে । কিন্তু সময়ৰ পৰিবৰ্তনৰ লগে লগে ডিজিটেল মাধ্যমৰ যুগত ই-আলোচনীৰ ভূমিকাও অত্যন্ত একেদৰেই গুৰুত্বপূৰ্ণ হৈ পৰিছে । আলোচনীৰ মজিয়াত প্ৰৱন্ধ, কবিতা, গল্প, চিত্ৰাংকন আদি বিভিন্ন সৃষ্টিশীল কৰ্মৰ জৰিয়তে নতুন চিন্তা আৰু অনুভৱৰ প্ৰকাশ ঘটে । ছাত্ৰ-ছাত্ৰীৰ লগতে শিক্ষাৰ লগত জড়িত প্ৰতি গৰাকী ব্যক্তিৰেই এই প্ৰতিভাসমূহ বিকাশৰ ক্ষেত্ৰত ই-আলোচনী জ্ঞানমে যৎপৰোনাস্তি প্ৰয়াস কৰি আহিছে ।

দক্ষিণ কামৰূপৰ অতি শ্ৰদ্ধাৰ, লোক-কৃষ্টিৰ সাধক, গুৰু, ক্ৰীড়া সংগঠক সদ্যপ্ৰয়াত সুকুমাৰ মেধি ডাঙৰীয়াৰ পৱিত্ৰ স্মৃতিত ষষ্ঠ বৰ্ষৰ তৃতীয় বিশেষ সংখ্যাটি প্ৰকাশ কৰা হৈছে । লগতে এই ই-আলোচনীখনত কামৰূপ জিলাৰ বিভিন্ন বিদ্যালয়ৰ ছাত্ৰ-ছাত্ৰী, শিক্ষকৰ সৃষ্টিশীল লেখা সন্নিৱিষ্ট কৰা হৈছে । ইয়াৰ উপৰিও প্ৰয়াত সুকুমাৰ মেধি ডাঙৰীয়াৰ অতিকৈ আপোন ব্যক্তি কেইগৰাকীমানৰ মেধি ডাঙৰীয়া বিষয়ক বহুকেইটা লেখা প্ৰকাশ কৰা হৈছে । লেখা সমূহত সকলোৰে কল্পনা, চিন্তা আৰু সমাজৰ প্ৰতি থকা দায়িত্ববোধ এই লেখাবোৰৰ মাজেৰে প্ৰতিফলিত হৈছে বুলি আশা কৰা হৈছে । অনাগত দিনত এই আলোচনীখন পঢ়ুৱৈসকলৰ বাবে জ্ঞান আৰু আনন্দৰ এক সুন্দৰ উৎস হৈ উঠিব ।

ই-আলোচনী 'জ্ঞানম' প্ৰস্তুত কৰাৰ ক্ষেত্ৰত সহযোগিতা আগবঢ়োৱা শৈক্ষিক গোটৰ শ্ৰদ্ধাৰ তত্বাৱধায়িকা বাইদেউ, সন্মানীয় সভাপতি/সম্পাদকৰ লগতে প্ৰতিগৰাকী সদস্য, শিক্ষক-শিক্ষয়িত্ৰী, ছাত্ৰ-ছাত্ৰী আৰু শুভাকাঙ্ক্ষীসকলক আন্তৰিক ধন্যবাদ জ্ঞাপন কৰিলোঁ । আগন্তুক দিনতো সকলোৰে সহযোগিতা লাভ কৰিম বুলি আশা ৰাখিলোঁ ।

শেষত সকলো পঢ়ুৱৈক আমাৰ ৱেবছাইটৰ যোগেদি আলোচনীখন উপভোগ কৰিবলৈ আমন্ত্ৰণ জনালোঁ । আপোনাসৱৰ দিহা-পৰামৰ্শ শৈক্ষিক গোট 'জ্ঞানম' কামৰূপ পৰিয়ালে সাদৰেৰে গ্ৰহণ কৰিব । ধন্যবাদ ।

শ্ৰদ্ধাৰে...

সম্পাদক

ই-আলোচনী 'জ্ঞানম