উৰুখা পঁজাৰ বিননি
পোনা, গা ধোৱা হ'লনে ? ...অ' পোনা মুখেৰে নামাত যে মই কি সুধিছো শুনিছনে নাই ? হাৰে ইয়াৰ মাত নাই যে !!পোনা অ' পোনা...
"ক'ৰ'না ভাইৰাছ টু থাউজেন্ড নাইনটিন বা সংক্ষেপে ক'ভিড নাইনটিনৰ প্রাৰম্ভিক লক্ষনসমূহ আকৌ এবাৰ পঢ়ি দিছো জ্বৰ, মুৰৰ বিষ, নাকেৰে পানী ওলোৱা, ডিঙিৰ বিষ, উশাহ নিশাহত কষ্ট পোৱা | এনে কিবা লক্ষণ দেখিলেই ততালিকে চিকিৎসকৰ পৰামৰ্শ গ্ৰহণ কৰক |"
অহ, দেখিছনে তাৰ কাণ্ড ৰেডিঅ'টো ইয়াত বজায় থৈ বপুৰা নাই দেখোন | ক'লৈ বা গ'ল এই দুপৰীয়াখন !! পোনা অ' পোনা.... তাক বিচাৰি পদুমী বাট পালেগৈ |এনেতে পোনাকণো আহি পালে |পদুমীয়ে খঙেৰে সুধিলে --এই ভৰ দুপৰীয়াখন কলৈ গৈছিলি ?
মা, দিলীপ ককাইদেউক আজি ইমান ডাঙৰ গাড়ী এখনেৰে হাস্পতালৰ পৰা লৈ আনিছে নহয় |
কি?? তাৰমানে তই সিহঁতৰ ঘৰলৈ গৈছিলি নেকি ? মই সিহঁতৰ ঘৰলৈ যাবলৈ মানা কৰিছিলো নে নাই??
ঘৰলৈ যোৱা নাই নহয় |পদূলিৰ পৰাহে চাইছো |মা, ককাইদেউ কিন্তু অলপ শকত হৈছে আৰু সৰু ককাইদেউক কি কৈছে জান...
পিছত শুনিম সেইবোৰ | বতৰটো কেনে আন্ধাৰ কৰি আনিছে দেখিছনে অলপ পিছতেই বৰষুন আহিব |কেনেবাকৈ বৰষুনত তিতি জ্বৰ হব লাগিলে লগেলগেই ক'ৰনাই লগ দিব |
মা, জ্বৰ হলেই ক'ৰনা হয় নেকি ?
হ'বও পাৰে |এতিয়া তই সোনকালে গাটো ধুই আহ মই ভাত বাঢ়ো |
মা, ভাতৰ লগত আজি কিবা বনাইছনে?
কি বনাম? অইনদিনা যি খাৱ আজিও একেই |
তেনেহলে নাখাওঁ মই ভাত |
কিয় ?
সদায় সদায় নিমখ তেলেৰে শুকান ভাত খাব পাৰি নেকি?
কিয় নোৱাৰি? জমিদাৰৰ পুতেক ওলাইছ? দুখীয়াৰ ঘৰত জন্ম হৈছ' যেতিয়া কাঁহীত যি পৰে সেয়াই খাব লাগিব |বাপেৰটো বিচনাত পৰি আছে মই কেনেদৰে নিমখ তেলখিনি যোগাৰ কৰিছো জাননে? আজিৰপৰা এইখিনিও মুখত নপৰিব |তলি উদং |তাৰপিছতহে ভোকতে ঘাঁহ বন সৱ খাব লাগিব |
পদুমীৰ কথা শুনি খঙতে পোনাকণ তাৰপৰা গুচি গ'ল |ভিতৰৰপৰা ৰমেশে দুয়োজনৰে কথাবোৰ শুনি বিচনাতে উচপিচাব ধৰিলে | মনতে ভাবিলে তাৰ নিচিনা পিতৃ জীয়াই থাকি লাভ নাই যিয়ে নিজৰ সন্তানৰ ভোকৰ সময়তো এসাঁজ ভালকৈ খুৱাব নোৱাৰে |লাহেকৈ বিচনাৰ পৰা উঠি আহিল ৰমেশ |ৰমেশক দেখি পদুমীয়ে চিঞৰি উঠিল.--
হাৰে আপুনি আকৌ বিচনাৰ পৰা কিয় উঠি আহিল? ডাক্তৰে আপোনাক বিচনাতে থাকিবলৈ কৈছে নহয় |
হ'ব দে |কিমান আৰু বিচনাতে থাকিম |বহুত আৰাম কৰিলো |চাও বেগখন দেচোন |
বেগ কেলেই? ক'লৈ যায় আপুনি?
অলপ থেলাখনকেই উলিয়াই নিও ৰহচোন কিজানি দুই এটকা পাওৱেই |
ক'লৈকো যাব নোৱাৰে | প্রথমে নিজৰ শৰীৰটোকে সুস্থ কৰি লওঁকচোন | পিছেপৰেও সেইবোৰ ভাবিব |মই আছো নহয় |ব'লক বিচনালৈ |
তই বুজা নাই অ পদুমী |পোনাৰ শুকান মুখখন মই আৰু চাব নোৱাৰো |যিজন পিতৃয়ে ভোকত আতুৰ সন্তানক অন্ন এমুঠিৰ যোগাৰ কৰি দিব নোৱাৰে তেনে পিতৃ জীয়াই থাকি লাভ নাই |মই মৰি যোৱাই ভাল |
মনে মনে থাককচোন |কি অমংগলীয়া কথাবোৰ কৈছে |
তইতো মোক বুজিবলৈ চেষ্টা কৰ অ' পদুমী |আজি এবাৰ যাও দে |
কিন্তু কিবা লকডাউনৰ কথা কৈছে যে ?
এহ কিবা কলে বুজায় কম দে |এতিয়া বেগখন দে আৰু কি কি লাগিব ক |
কেইটামান চাউলৰ বাহিৰে একোৱেই নাই ঘৰত আৰু পইচা পায় যদি এপোৱামান দালি আৰু আলু আনিব নহলে | পোনাক গালিহে দিও কিন্তু সুদা ভাতকেইটা গিলিবলৈ কিমান কষ্ট সেয়া মইও ভালকৈ জানো |
হ'ব দে বেগখন দে |
হুম এইখন বেগ লওঁক |
মই আহো এতিয়া |
অহ ৰবচোন মাস্কখন পিন্ধি যাওক |
উম পাহৰিছিলোৱেই |
বজাৰলৈ যাবলৈ ওলোৱা দেখি পোনাকণ দৌৰি আহি ৰমেশক কলে --দেউতা মাছ আনিবি বহুদিন মাছেই খোৱা নাই |
হব হব | যদি পাও ডাঙৰ ৰৌ মাছ এটাকে আনিম দে | এতিয়া যা ভাতকইটা খাই ল |
তই আহিলে খাম |
............ ...................
পদুমী, পোনা ...
কিছুসময়ৰ পিছতেই ৰমেশৰ মাত শুনি দুয়োজন বাহিৰলৈ ওলাই আহি দেখিলে ৰমেশে লেকেচিয়াই লেকেচিয়াই খোজ কাঢ়ি আহিছে | পদুমী দৌৰি গ'ল ৰমেশৰ ওচৰলৈ --
হে হৰি কি হ'ল আপোনাৰ ?মোৰ কথা নুশুনিলে নহয় |
আস্ ভৰিখন |
কেনেকৈ হ'ল? ভৰিখন ফাটি উঠিছে দেখোন |
মই টাউনলৈ যাবই নাপালো অ |বাটতে পুলিচে আগচি ধৰি বৰকৈ কোবালে |মই ইমানকৈ বুজাবলৈ চেষ্টা কৰিলো নুবুজিলেও | আস্ ধৰচোন | পোনা অ' মোক ক্ষমা কৰি দিবি দেই বোপা | মই তোৰ বাবে মাছ আনিব নোৱাৰিলো অ' |
এতিয়া বলকচোন ভিতৰলৈ |এই বেমাৰী মানুহজনকনো এনেকৈ কোবাব লাগেনে? হেৰৌ, আমি যদি এনেকৈ দিনৰ পিছত দিন ধৰি ঘৰখনতেই সোমাই থাকিব লাগে তেন্তে কি কৰি খাম? কোনে খুৱাব?? --ৰমেশক কান্ধত ধৰি লৈ গ'ল পদুমীয়ে |
চোতালত পৰি ৰোৱা উদং মোনাখনলৈ দুখমনেৰে চাই ৰ'ল পোনাকণে | কতদিনৰ মূৰত মাছেৰে ভাত এসাজ খাবলৈ পাব বুলি আশা কৰি আছিল !!এটা কৰুন হুমুনিয়াহ ওলাল পোনাকনৰ মুখেৰে | ইতিমধ্যে ধৰালৈ বৰষুন নামি আহিছিল |বৰষুনজাকলৈ কিছুপৰ চাই ৰ'ল সি | হঠাতে কিবা এটা মনত পৰি পোনাকণৰ মুখখনত যেন সাতোৰঙৰ ৰামধেনুৰ সমাহাৰ ঘটিল |লগে লগে সি ভিতৰলৈ গৈ পদুমীক কলে --মা, দিলীপ ককাইদেৱে সৰু ককাইদেউক কোৱা শুনিছো ক'ৰনা হ'লে হেনো হাস্পাতালত মাছে মঙহে খাৱলৈ দিয়ে | পদুমীৰ উত্তৰলৈ বাট নাচাই সি পুনৰ ঘূৰি আহিল চোতাললৈ আৰু দুহাত মেলি সাৱটিবলৈ ধৰিলে বৰষুনজাকক --এটাই আশা ,"বৰষুনত তিতিলে তাৰ জ্বৰ হব, জ্বৰ হলে ক'ৰনা হব আৰু ক'ৰনা হলে মাছে মঙহেৰে এসাঁজ খাবলৈ পাব |"
(সমাপ্ত)
(সমাপ্ত)
*****************************
জেজাৰবড়ী প্রাথমিক বিদ্যালয়
ৰামপুৰ শিক্ষাখণ্ড
ৰামপুৰ ক্লাছটাৰ
0 Comments