Labels

চেষ্টাৰ অসাধ্য একো নাই | Assamese Short Story by Chandana Hira

চেষ্টাৰ অসাধ্য একো নাই

       ৰাতিপুৱা শুই উঠিয়েই চকুদুটা মোহাৰি মোহাৰি মন্টিয়ে দুৱাৰখন খুলি  বাহিৰলৈ ওলাই আহিল। হঠাৎ তাৰ চকু পৰিল দুৱাৰমুখত পৰি থকা বাতৰি-কাকতখনৰ ওপৰত। সি তাত আগতে নেদেখা অদ্ভুত দৃশ্য এটি দেখিবলৈ পালে। ল'ৰা এজনে ভৰিৰ আঙুলিৰে ধুনীয়া ছবি এখন আঁকি আছে। ল'ৰাটোৰ হাত দুখন নাই। সি বাতৰি-কাকতখন বুটলি লৈ "দেউতা, দেউতা" বুলি দৌৰি গৈ দেউতাকৰ ওচৰ পালেগৈ। দেউতাকে তেতিয়া পিছফালে মুখ‌ ধুই আছিল। সি গৈ দেউতাকক ক'লে,

 

    "চোৱাচোন দেউতা , ভৰিৰে ইমান ধুনীয়া ছবি আঁকিছে..... !!"

 

     দেউতাকে মুখ ধুই‌ থাকিয়েই ক'লে,

     "বাতৰিৰ শিৰোনামত কি লিখিছে পঢ়াচোন তুমি।"

    সি পঢ়ি গ'ল...

     'চিত্ৰাংকন প্ৰতিযোগিতাত ৰাষ্ট্ৰীয় প্ৰেক্ষাপটত প্ৰথম পুৰস্কাৰেৰে জিলিকিল বিশেষভাৱে সক্ষম অসম-সন্তান তথা ষষ্ঠ শ্ৰেণীৰ ছাত্ৰ অভিজ্ঞান ডেকা। শিশু দিৱসৰ দিনাখন শঙ্কৰদেৱ কলাক্ষেত্ৰত অসমৰ মুখ্যমন্ত্ৰীৰদ্বাৰা সম্বৰ্দ্ধনা --- বিশেষভাৱে সক্ষম শিশু শিল্পী গৰাকীক।'

 

     কথাখিনি পঢ়ি সি দেউতাকক সুধিলে ,

    "এয়া কেনেকৈ সম্ভৱ দেউতা ? তাক দেখি মোৰ বৰ দুখ লাগিছে।"      দেউতাকে উত্তৰ দিলে ,

    "চেষ্টাৰ অসাধ্য একো নাই সোণ, মানুহে চেষ্টা কৰিলে অতি টান কামো সহজ হৈ পৰে। তাৰ কাৰণে মানুহক লাগে আত্মবিশ্বাস, ধৈর্য আৰু একাগ্ৰতা ; নহ'লেনো অভিজ্ঞানে‌ অকল ভৰিৰে ইমান ধুনীয়া ছবি আঁকিব পাৰেনে? মনপুতি কৰিলে সকলো কামেই সহজ হৈ পৰে।" দেউতাকৰ‌ কথাখিনিয়ে মন্টিক দুগুণ  উৎসাহ দিলে। সি মনতে দৃঢ়প্ৰতিজ্ঞ হ'ল -- আজিৰ পৰা সি পঢ়া - শুনা, ছবি অঁকা বা যি কামেই নকৰক কিয়.. মনপুতি কৰিব; যাতে‌‌ অভিজ্ঞানৰ‌ দৰে তাকো এদিন সকলোৱে চিনি পায়।

    

**********************************


চন্দনা হীৰা

সহ: শিক্ষয়িত্ৰী

বঙৰা‌ পাছনীয়াপাৰা মজলীয়া বিদ্যালয়।

মোবাইল নং--7002785923


অলংকৰণ :- সংগীতা কাকতি

Post a Comment

0 Comments