Labels

গুণোৎসৱ- এক মিঠা অভিজ্ঞতা l Assamese Article by Thaneswar Malakar

 গুণোৎসৱ- এক মিঠা অভিজ্ঞতা 


      "গুণোৎসৱ ২০২২'' ৰ দ্বিতীয় পৰ্যায়ত বৰ্হিমূল্যায়ক হিচাবে চাৰিখন বিদ্যালয় পৰিদৰ্শন কৰাৰ আমাৰ অভিজ্ঞতা হ'ল । উক্ত বিদ্যালয় কেইখন আছিল - (১) বোৰ্কা -সাতগাঁও হাইস্কুল , (২) নগৰবেৰা উচ্চতৰ মাধ্যমিক বিদ্যালয় , (৩) শংকৰদেৱ হাইস্কুল , নগৰবেৰা আৰু (৪) আদৰ্শ বিদ্যালয় , দকুছি ।

      চৰকাৰৰ নিৰ্দেশ মতে প্ৰাৰ্থনা  সভাত যোগ দিলোঁ , শ্ৰেণীয়ে শ্ৰেণীয়ে পাঠ পঢ়া চালোঁ , পৰীক্ষা দিয়া কাৰ্য নিৰীক্ষণ কৰিলোঁ , বিদ্যালয় কেইখনৰ আন্ত:গাঁথনি , নথি-পত্ৰৰ সংৰক্ষণ ব্যবস্থা , পুথিভঁৰাল আৰু কম্পিউটাৰ আদিৰ ব্যৱহাৰৰ নানা দিশ চালোঁ । শিক্ষকমণ্ডলী আৰু নেতৃস্থানীয় লোকসকলৰ লগত মত-বিনিময় কৰিলোঁ । বিদ্যালয় কেইখনত আৰু ইয়াৰ আশে-পাশে এক আনন্দ মুখৰ পৰিবেশ । মাতৃগোটৰ আই সকলো আহিছে । 

     গুণোৎসৱে এক বিশেষ সচেতনতা আৰু সজাগতা অনা পৰিলক্ষিত হ'ল । বিদ্যালয়খন যে মাত্ৰ অনুস্থানেই নহয় ; ই সমাজৰ এক সম্পদ , অঞ্চলটোক জ্ঞানৰ আলোকেৰে আলোকিত কৰিব পৰা এটা মহৎ অনুস্থান । এই কথা ৰাইজে বুজিছে আৰু শিক্ষক সকলেও তেখেতসকলৰ কৰ্তব্য যে মাত্র চাৰিবেৰৰ মাজত শিক্ষাদান কৰাই নহয় , ছাত্র-ছাত্রীৰ সামগ্ৰিক উন্নয়ন আৰু বিকাশৰ বাবে তেখেতসকল যে দায়বদ্ধ - এই কথা গুণোৎসৱে তেখেতসকলক  সোঁৱৰাই দিছে । '' All round development '' ৰ গভীৰ অৰ্থ তেখেতসকলে বুজিছে । 

      গুণোৎসৱ সম্পর্কত বহুত নেতিবাচক কথাও কোৱা হৈছে । ধৰি লোৱা হওঁক - গুণোৎসৱৰপৰা লাভ হোৱা নাই । গুণোৎসৱ হ'ব নালাগে । তেন্তে কি হ'ব লাগে ? আমাৰ হাতত ইয়াৰ  'Alternative' কি আছে ? কোনেও কব পৰা নাই । যদি অন্য বিকল্প নাথাকে , তেন্তে যিটো ব্যবস্থা আজিৰ বাবে উত্তম-তাক গ্ৰহণ কৰাই শ্ৰেয়: । সাম্প্রতিক সময়ত গুণোৎসৱেই হ'ল উত্তম ব্যৱস্থা - এখন বিদ্যালয়ক জানিবলৈ , বিদ্যালয়খনৰ শিক্ষাৰ মান আৰু ছাত্র- ছাত্রীৰ বাবে গ্ৰহণ কৰা কল্যাণকামী কাৰ্যসূচীৰ কথা জানিবলৈ । 

         মই পৰিদৰ্শন কৰা বিদ্যালয় কেইখনত দেখিলোঁ - ছাত্র-ছাত্ৰীয়ে শৃংখলা ৰক্ষা কৰি প্ৰাৰ্থনা কৰিছে , চৌহদ চাফ-চিকুণ কৰি ৰাখিছে , শ্ৰেণীত সোধা প্ৰশ্নৰ উত্তৰ দিব পাৰিছে , সাধাৰণ জ্ঞান , সংস্কৃতি , ভূগোল সম্পৰ্কীয় প্ৰশ্নৰ উত্তৰ দিব পাৰিছে , শ্ৰেণীকোঠোতে গান গাব পাৰিছে , নৃত্যও কৰিব পাৰিছে । তেওঁলোকৰ মেধা আছে , আগ্ৰহো আছে । লাগে মাত্ৰ আমাৰ  'Support' উৎসাহ আৰু  'Guidance' ।

          বিদ্যালয় কেইখনত ছাত্ৰৰ অনুপাতে শিক্ষকৰ সংখ্যা কম । বহুকেইজন শিক্ষকে অৱসৰ ললে । লগতে বহুকেইটা মঞ্জুৰী প্ৰাপ্ত (Sanctioned) পদ খালী হৈ আছে । সেইবোৰ পূৰণ কৰা হোৱা নাই । বিষয় শিক্ষক ন'হলে ক্লাছ চলিব কেনেকৈ ? বোৰ্কা হাইস্কুলক এই বছৰৰ পৰা উচ্চতৰ মাধ্যমিক বিদ্যালয়লৈ উন্নীত কৰা হৈছে । কিন্তু শ্ৰেণীকোঠা নাই , ডেস্ক-বেঞ্চৰ অভাৱ । ছাত্রীৰ বাবে কোনোখন বিদ্যালয়তে ছাত্রী জিৰণি কোঠা নাই । অসমৰ সকলো বিদ্যালয়তে ইয়াৰ সুবিধা থাকিব লাগে যাতে মাহেকীয়া ঋতুস্ৰাৱ বা তেনে অসুবিধাত ছাত্রীবোৰে  ছাত্রী জিৰণি কোঠাৰ ব্যৱহাৰ কৰিব পাৰে । 

         চাৰিওখন বিদ্যালয়তে পুথিভঁৰালৰ অৱস্থা পুতৌলগা । পৃথক পুথিভঁৰাল ভৱনৰ দৰকাৰ, য'ত ছাত্র-ছাত্রীবোৰে বহিও কিতাপ পঢ়িব পাৰে বা দৰকাৰী কথা 'নোট' কৰিব পাৰে । 

         চাৰিওখন বিদ্যালয়তে যথেষ্ঠ  মাটি আছে । ২০-৩০ বিঘা থকা মাটিত উৎপাদন মুখী আচঁনি / অমৃত সাগৰ আচঁনি গ্ৰহণ কৰি বিদ্যালয় কেইখনে নিজৰ নিজৰ আন্ত:গাঁথনি সবল কৰিব পাৰে । 

        চৰকাৰী পৰ্য্যায়ত মাননীয় শিক্ষামন্ত্রী আৰু গ্ৰামোন্নয়ন মন্ত্রীয়ে সংশ্লিষ্ট বিধায়কৰ লগত বহি বিদ্যালয় বোৰৰ আন্ত:গাঁথনি সবল কৰাত গুৰুত্বপূৰ্ণ ভূমিকা গ্ৰহণ কৰিব পাৰে । তেনে কৰিলে গ্ৰামোন্নয়ন শিতানৰ ধনেৰে আৰু বিধায়ক পুঁজিৰে বহুখিনি কাম কৰিব পৰা হ'ব । 

        ছাত্র- ছাত্রীৰ গুণগত মান উন্নয়নৰ বাবে বিদ্যালয় প্ৰধানে বিশেষ ব্যবস্থা ল'ব পাৰে । যেনে - শ্ৰেণীবোৰৰ মাজত তৰ্ক , বক্তৃতা , বানান , কুইজ প্ৰতিযোগিতা আদিৰ ব্যবস্থা কৰিব পাৰে । চাফ- চিকুণতা আৰু শৃংখলা  ৰক্ষা কৰা ছাত্র-ছাত্ৰীক পুৰস্কাৰ / প্ৰমাণ পত্ৰ দিয়াৰ ব্যৱস্থা কৰিব পৰা হয় । বছৰত দুবাৰ অভিভাৱকৰ লগত মত বিনিময়ৰ আয়োজন কৰিলে অভিভাৱকৰ লগত সম্বন্ধ নিবিড়  হ'ব । 

        এটা ভাল লগা কথা কব বিচাৰিছোঁ। নগৰবেৰা উ: মা: বিদ্যালয়ত এগৰাকী ছাত্রীক সুধিলো - 'Postman 'মানে কি ? মই আশা কৰিছিলো তেওঁ 'পিয়ন' বুলি ক'ব । কিন্তু মোক আচৰিত কৰি উত্তৰত তেওঁ কলে - '' ডাকোৱাল ''। উত্তৰ শুনি মন ভৰি গ'ল !! লগতে ক'লো 'পিয়নক লৈ এটি গীত আছে। জানানে? ছাত্র এজনে গাই দিলে-শিল্পী খগেন মহন্তৰ জনপ্ৰিয় গীত- 


 " চকুৰে নেদেখা দূৰণিতে

আছোহি পিয়নৰ চাকৰিতে " । 


শংকৰদেৱ হাইস্কুলত সুধিলোঁ - অসমৰ গৃহ মন্ত্রী কোন ?

সঠিক উত্তৰ দিলে - মাননীয় ড: হিমন্তবিশ্ব শৰ্মা । 

        অসমত গুণোৎসৱৰ যেতিয়া কুচ - কাৱাজ চলিছিল (ইং২০১৫-১৬) , তেতিয়া মই সৰ্বশিক্ষাৰ মিছন সঞ্চালক আছিলোঁ । গুজৰাটৰপৰা বিষয়াসকল আহি আমাক প্ৰশিক্ষণ দিছিল । কিন্তু তাক কাৰ্যকৰী কৰাৰ আগমুহূতৰ্ত  আমি বৰপেটা জিলাৰ উপায়ুক্ত হিচাবে বদলি হোৱাৰ পৰিপ্ৰেক্ষিতত জিলা পৰ্যায়ত প্ৰথম গুণোৎসৱ কাৰ্য্যকৰী কৰাৰ অংশীদাৰ হবলৈ সুযোগ পাইছিলোঁ । তেতিয়াৰপৰা গুণোৎসৱৰ লগত জড়িত হৈ থাকি ক'ব পাৰোঁ যে - গুণোৎসৱে শিক্ষাৰ উৎকৰ্ষ সাধনত , বিদ্যালয়সমূহৰ আন্ত:গাঁথনি উন্নীত কৰাত গুৰুত্বপূর্ণ ভূমিকা গ্ৰহণ কৰি আহিছে । মাত্র গুণোৎসৱ  এক উৎসৱ নহৈ  ই হ'ব লাগিব আমাৰ অভ্যাস (Habit) ।

         আমি বিদ্যালয়খনক অঞ্চলটোৰ '' Learning centre '' আৰু ''Public asset '' হিচাবে প্ৰতিষ্ঠা কৰিব পাৰিব লাগিব ।

          তাতেই নিহিত হৈ আছে গুণোৎসৱ পালনৰ সাৰ্থকতা । 


 


লেখকৰ ঠিকনা:

থানেশ্বৰ মালাকাৰ ।

প্ৰাক্তন আয়ুক্ত - সচিব 

অসম চৰকাৰ 

চচল, গুৱাহাটী -২২

(৯৪৩৫০-৫৪৩৮৪)

Post a Comment

0 Comments