বড়ো প্ৰবন্ধ,बिफां लाइफां आरो फिथाइ सामथायनि फ्राय मुलि बानायनाय आरो बाहायनाय,Bhairabi Baro, ৪ৰ্থ বছৰ ২য় সংখ্যা

 बिफां लाइफां आरो फिथाइ सामथायनि फ्राय मुलि बानायनाय आरो बाहायनाय

    1-0 जागायनाय
गोदो गोदाय मिथिस'हायै समनिफ्राइनो सुबुं माहारिया  मिथिंगायाव मोननाय बिफां लाइफां आरो फिथाइ सामथायनि फ्राय मुलि बानायनाय आरो बाहायनायनि खोथाखौ मिथिनो मोनो। आगु सुबुं फोरा देहा सोलेराव बायदि मैया बेराम आजार जाबोला जखम जाबोला दंफां बेन्दों रोदा बिलाइ आरि खांथिंनानै फिसा फिसौ फोरखौ खांबोदों आरो फेदेरबोदों। Allopathic मुलि बाहायनायनि सिगां सुबुं फोरा मिथिंगायाव मोननाय बिफां लाइफां फिथाइ सामथायनि फ्रायनो बिदै,भरन एबा गोथां लेप लागायनानै सरासनस्रा साफ्रोमबो सुबुंआनो सुबुं मुलिफोरनि बाहायथिजोँ जिउ खांबोदों।  आथिखालाव बै बेसेन गोनां बिफां लाइफां फिथाइ सामथायफोरा जायगा आरो बाहायथिनि आंखालाव गोमा लांनो हमबाय।गुन गोनां बिफां लाइफां खौ सिनायनो रोंयै आरो सिनायनो रोंब्लाबो मोननो गैयै जालांबाय। मानोना मानसिनि अनजिमाया बांलांबाय थानायाव न'-बां लुनो, लामा- सामा बानायनो बायदि सिना दारिमिन फसंथान फसंनो थाखाय हा-हु ,जाहार बारि बागान फोजोबनायनि थाखाय दिनै बे बेसेन गोसा बिफां लाइफां फिथाइ सामथायफोरा गोमालांनो हमदों।

आथिखालाव गोनोखोयारि राहाजों बायदिसिना बेराम  बाहायनायनि राहा ओंखारबाय जायनि थाखाय गावनि न'आवनो  मोननो हानाय बिफां लाइफां फोरखौ  बाहायना देहा गोगो लाखिनाय, बेराम होबथानाय, फाहामनायनि गोनांथिआ खमायबोनो हमदों। समनि आंखालाव गावनि न'आवनो थाखानाय मुलिफोरखौ बायनानै मोननाय जानाय खाय बेफोरखौ बावगारबाय। नाथाय जों बेखौबो सिमान जानांगोन दि आथिखालाव गोनोखोयारि राहाजों बायदिसिना बेराम होबथानाय फाहामनायनि राहा ओंखारबायब्लाबो नुनो मोनोदि थांनानै थानो आरो देहाखौ गोगो आरो थाजिम लाखिनो थाखाय़ मैगं थाइगं आरो फिथाइ सामथायनि बिदै बाहायनायखौ नुनो मोनो। अब्ला बे हाग्रा बंग्रा फिथाइ सामथायफोरा जोँनि देहानि खहा जानाय फोरखौ फाहामनो हानायनि मुलि गुनआ दंखाथारो। बेनिखायनो गोदोनिफ्रायनो बे बायदिसिना  फिथाइ सामथायनि बिदै आरो बाहायथिनि गेजेरजों फाहामथाय हुदाया सोलिबोगासिनो आरो आथिखाल गोनोखोयारि मुगायावबो बेनि बाहायथिया अनसायजानायनि थांखियैनो बे आयदाखौ बिजिरसंनाय जादों।सुबुंमुलिनि बाहायथि एबा माबे बेरामाव माखौ माबादि बाहायनाय जायो बेखौ मिथिहोनायजों लोगोसे लिरनाय महराव अराय गोजोर खालामना दोननायानो बै आयदाखौ संजिरनायनि गाहाइ थांखि।

2-0 दोरोङारि बाहायथि-
सुबुं मुलिफोरनि बाहायथिया मोनसे दोरोंजों बाहायजाबोदों। बेद उपनिषदनि अनगायैबो गोबां धोरोम  बिजाबफोराव  हाग्रा बंग्रा, बिफां लाइफांखौ  बेराम-आजार फाहामथायनि राहा महरै बाहायनायनि खोथाखौ मिथिनो मोनो। गोबां रोखोमनि हाग्रानि बिफां लाइफां फिथाइ सामथायखौ गोनोखो थामहिनबा बिगियानाबो मुलिनि गुन थानायखौ गनायनानै लादों। आरो बेफोरखौनो  बिथांमोनाबो गोनोखोयारि आदबजों जुदा रोखोमै बानायनानै बेराम होबथानाय आरो फाहामनायनि बेलायाव बाहायबोगासिनो। बेवहायनो जों गुनाराम खनिकर बिथांनि मुंखौ मख'थारनांगोन। बिथाङा गावनि  रिसार्च सेन्टार  Regional Research and Training Centre on Indian Traditional Treatment गुसुंयै  RRTCITT खौ  गायसननानै सुबुं मुलिफोरनि बाहायथि आरो गोसारथिखौ मुलुगाव आलादा रोखोमै सिनायथि होदों। आथिखालनि आयुर्वेदनि जा  फाहामथाय राहा  बे दोरोङारि सुबुं मुलिनिनो मोनसे गोदान एबा सोदांनाय महर होनजायो जायखौ जों मुलुगनि
गासैजोंबो अन्सायजानाय महराव दा  नुनो मोनो।

3-0 सुबुं मुलि बाहायनायनि गोसारथि

सरासनस्रा साफ्रोमबो सुबुंआनो सुबुं मुलिखौ सानफ्रोमबोनि जिउआव बाहायबाय थायो आरो बेनि बागै बयहाबो थोजासे गियान थानायखौ नुनो मोनो। आगु सुबुं फोरा बाहायबोनाय बे सुबुं मुलिफोरनि बाहायथिया आथिखालावबो गामि, ओनसोल,हादोर,हादोर गेजेरारि जेरावबो गोसारना थानायखौ नुनो मोनो।आसाम एबा भारतावल' नङा सारा मुलुगावनो बेनि गोनांथि आरो गोहोमखौ नुनो मोनो। मुलुगनां सावस्रि फसंथान ( বিশ্ব স্বাস্থ্য সংস্থা)नि फोरमायनाय बादिब्ला मुलुगनि गासै द'जि(60) जौखोन्दो सुबुं आरो भारतनि दाइनजि(80) जौखोन्दो सुबुंआनो बिफां लाइफां फिथाइ सामथायनि फ्राय बाहायनाय सुबुं मुलिफोरनि सायावनो सोनारो।
4-0 सुबुं मुलि बाहायनायनि गोनांथि

आथिखालाव गोनोखोनि राहाजों बायदिसिना बेराम होबथानाय फाहामनायनि राहा ओंखारबायब्लाबो जाय गाननो मोननाय हाग्रा- बंग्रा बिफां-लाइफां, बिलाइ, बिबार,रोदाफोरखौ बाहायना देहा गोगो लाखिनाय, बेराम होबथानाय, फाहामनायनि गोनांथिया दासिमबो जोबनानै थांआखै।जों थांना थानो थाखाय आरो देहाखौ थाजिम आरो सावस्रिखौ गोगोयै लाखिनो थाखाय बायदिसिना मैगं -थाइगं, फिथाइ-सामथाय बाहायनाय नुनो मोनो। नाथाय बे रोंनायफोरा बबेबा मोनसेखौल' रोंनानै दलद थादों ,फेहेरनो एबा गावनि रोंनायखौ  गुबुननो फोरोंनानै गालांनो गोसो जायाखै। बेनिखायनो बेबादि बेराम फाहामनो हानाय बे रोंगौथिया जोंनि गेजेरनि  फोराय गोमा लांनो हमबाय। सुबुं माहारिनि थाखाय बे गोनांथार बिथिंखौ आथिखालाव समाजनि गासै सुबुंनोनो मिथिहोनानै बाहायनायनि हुदाखौ लाखिनो हास्थायनाया गोनांथार जानानै फैदों।बेल' नंङा बेराम फाहामनो हानाय मुलिनि गुन गोनां बिफां लाइफां फोरनि बागान बानायनानै संरैखा खालामनो नांगौ। गावनि न'आवनो थाखानाय हाग्रा बंग्राजोनो फिसा-फिला बेराम फोरखौ होबथानो एबा फाहामनो हागोन। लोगोसे सुबुं माहारिया बेफोरनि बाहायथिखौ मोजाङै मिथिनानै सांग्रां जानायखौ आं  मिजि थिबाय।
5-0 फोजोबनाय
खारिथि फोरखौ गिबि फुंखा आरो लेआइ फुंखानिफ्राय बुथुमनाय जादों।आथिखालाव सुबुं मुलि फोरनि बाहायनाय आरो बेखौ बाहायनायाव सोलायनाय  जाउनफोरा जादों -
1.न'आवनो मोननाय बिफां लाइफां फिथाइ सामथायनि बाहायथिया लासै लासै जोबलांनो हमबाय।
2. हाग्रा बंग्रा जोबस्रांलांनायनि जाउनाव गोनां बिफां लाइफांनि अनजिमाया जोबलांनो हमबाय।
3.गोनोखोनि गोख्रों बाहायथि।
4. दोरोङारि मुलिफोरनि सिनायथिनि आंखाल।
5.सुबुं अनजिमा, दारिमिन आरो बायदि सिना फसंथान फोरनि  लोब लोब बांबोनाय।
सुबुं मुलिया सुबुं माहारिखौ गोदोनिफ्रायनो दिनैसिम जिउ खुंनायाव फिसा गिदिर बायदि बेरामफोरनि फाहामथायाव हेफाजाब होबोदों। बेराम आजारखौ सोखानौ जायफोर सुबुं मुलिफोरखौ बाहायो बेयाव बिगियाननि मोजां फिथाइखौ नागिरना मोनो थारैनो बेफोर देहानि थाखाय जोबोर मोजां होनना गनायनाय जायो।  बेबादिनो सुबुं मुलिया सुबुं माहारिनि जिउ रैखागिरि महरै बिफाव लाबोबाय थादों।



Bhairabi Baro
Assistant professor
Dept of Bodo
Jawaharlal Nehru College,Boko

Refference Books

ब्रह्म कालिचरन   बर'नि जलंगा,1958
ब्रह्म बीरेन्द्र कुमार,पाटिरि ब्रह्मानन्द, बसुमतारी हाती    बर'नि मुलि बिफां -लाइफां, 2002
बर' रेणु  मुली जलंगा,2007
खनिकर गुनाराम   समग्र बनौषधि,2012