অসমীয়া কবিতা I হেঁপাহৰ ব’হাগ l নৱজ্যোতি কুমাৰ l ৫ম বছৰ- ৩য় সংখ্যা

 হেঁপাহৰ ব’হাগ 

ফাগুনৰ পছোৱা নেওচি

চ'তৰ লঠঙা ভেদি

ধৰালে আকৌ আগমন ব’হাগৰ |

গছে-বনে মেলিলে কুঁহিপাত

বসুমতী আজি জীপাল

চোৱা, আমবোৰে মলিয়াইছে

কঁঠালে পেলাইছে মুচি

গছৰ ডালত ফুলিছে

চেনেহীৰ আদৰৰ কপৌফুল ,

পাতৰ আঁৰত লুকাই

কুলি-কেতেকী মইনা সখিয়তীয়ে

বিলাই ফুৰিছে অসমীয়াৰ  মন-প্ৰাণত

বতৰা আজি বিহুৰ ৷

যঁতৰত আঙুলিৰ উচপিচনি

তাঁত-শালত মাকোৰ ততা-তৈয়া 

গামোচা লৈ ৰৈ আছে 

কোন কাৰ পদূলিত !

গাঁৱে-ভূঞে চহৰে নগৰে

কিহৰ আখৰা কিহৰ কৰ্মশালা

ঢোলৰ ছেৱত কাৰ ভাঙিছে কঁকাল !

কত যে আদৰৰ কত যে চেনেহৰ

নতুন আশা নতুন সৃষ্টিৰ

এয়াই ব’হাগ হেঁপাহৰ ব’হাগ ৷

নৱজ্যোতি কুমাৰ 

সহঃ শিক্ষক ,

ঘটনগৰ মধ্য ইংৰাজী বিদ্যালয়