অসমীয়া প্ৰৱন্ধ l গ্ৰন্থৰ পোহৰেৰে উজ্বলাই তোলো আমাৰ সমাগত ভৱিষ্যত l হেমেন চন্দ্ৰ হাজৰিকা l ৫ম বছৰ- ৩য় সংখ্যা

 গ্ৰন্থৰ পোহৰেৰে উজ্বলাই তোলো আমাৰ সমাগত ভৱিষ্যতঃ

             আহক বন্ধুসকল ! গ্ৰন্থৰ পোহৰত নিজকে উজ্বলাই তোলো । গ্ৰন্থ এটা অমৃত শব্দ । বিশ্ব ইতিহাসৰ নজহা নপমা এটা শব্দ হ'ল গ্ৰন্থ । বিশ্ব গ্ৰন্থ দিৱস অথবা আন্তঃৰাষ্ট্ৰীয় কিতাপৰ দিন প্ৰতি বছৰে ২৩ এপ্ৰিল তাৰিখে সমগ্ৰ বিশ্বতে পালন কৰা এক দিৱস । এই দিনটো মূলতঃ গ্ৰন্থ অধ্যয়নৰ প্ৰতি লোকসকলক আকৰ্ষিত কৰাৰ উদ্দেশ্যে পালন কৰা হয় । গ্ৰন্থ অধ্যয়নে মানুহৰ মনৰ দিগন্ত প্ৰসাৰিত কৰে ৷ ৰাষ্টসংঘৰ 'ৰাষ্ট্ৰসংঘ শিক্ষা , বিজ্ঞান আৰু সংস্কৃতি সংস্থা'য়ে গ্ৰন্থ অধ্যয়ন , প্ৰকাশন আৰু কপিৰাইটৰ বিষয়ে সজাগতা সৃষ্টিৰ বাবে এই দিৱসৰ পাতনি মেলিছিল । ইং ১৯৯৫ চনৰ ২৩ এপ্ৰিল তাৰিখে পোন প্ৰথমবাৰৰ বাবে বিশ্ব গ্ৰন্থ দিৱসৰ শুভ আৰম্ভণি হৈছিল । এই দিনটোত বিশ্বৰ বিভিন্ন প্ৰান্তত বিভিন্ন কাৰ্যসূচীৰ মাধ্যমেৰে গ্ৰন্থ আৰু ইয়াৰ আনুসংগিক বিষয়সমূহ প্ৰচাৰ আৰু প্ৰসাৰৰ কাৰ্যপন্থা হাতত লোৱা হয় । এই ২৩ এপ্ৰিল দিনটোৰ এক বিশেষ তাৎপৰ্য আছে । আচৰিত ধৰণে এই তাৰিখটোৰ লগত জড়িত হৈ পৰিছিল বিশ্বৰ বহু নামী লোক । বিশেষকৈ ২৩ এপ্ৰিলত বহু লেখক সাহিত্যিকৰ জন্ম আৰু মৃত্যু হৈছিল । এনে কেতবোৰ কাৰণতে ২৩ এপ্ৰিলত উদযাপন কৰা হয় বিশ্ব গ্ৰন্থ দিৱস ।

          উল্লেখযোগ্য যে ২৩ এপ্ৰিল তাৰিখত প্ৰখ্যাত স্পেনিছ লেখক মিগুৱেল ডেকাৰডেণ্টছৰ দেহাৱসান হৈছিল । উইলিয়াম শ্বেকচ্‌পিয়েৰ আৰু ইনকা গাৰ্ছিলাছ ডেলা ভেগাৰৰো মৃত্যু হৈছিল ২৩ এপ্ৰিলত । তাৰোপৰি ২৩ এপ্ৰিল তাৰিখত জন্ম আৰু মৃত্যু হৈছিল অনেক প্ৰখ্যাত লেখক আৰু সাহিত্যিকৰ ।

          বিশ্বগ্ৰন্থ আৰু গ্ৰন্থস্বত্ব দিৱস সমগ্ৰ বিশ্বতে উদ্‌যাপন কৰি অহা হৈছে । আন্তঃৰাষ্ট্ৰীয় কিতাপৰ দিন হিচাপেও বহুতে উল্লেখ কৰে এই বিশেষ দিনটো । ৰাষ্ট্ৰসংঘৰ আটাইকেইখন সদস্য ৰাষ্ট্ৰই ২৩ এপ্ৰিল দিনটোত বিশ্ব গ্ৰন্থ দিৱস হিচাপে উদ্‌যাপন কৰা অনুসৰি ভাৰততো কিতাপ পঢ়া আৰু প্ৰকাশৰ ক্ষেত্ৰত উৎসাহিত আৰু সচেতনতা বিকাশৰ প্ৰয়াস কৰা হয় গ্ৰন্থ দিৱস উদযাপনৰ জৰিয়তে । বিশ্ব গ্ৰন্থ দিৱসৰ দিনা মন মগজু আৰু নিজৰ চিন্তাশক্তিক সক্ৰিয় আৰু শক্তিশালী কৰিবৰ বাবে গ্ৰন্থ অধ্যয়ন এক উত্তম আৰু সৰ্বশ্ৰেষ্ঠ ঔষধ । কিতাপেই হৈছে মানুহৰ শ্ৰেষ্ঠ আৰু পৰম বন্ধু । কোনো আধুনিক প্ৰযুক্তিয়ে কিতাপৰ দ্বাৰা পোৱা আমেজ পূৰ কৰিব নোৱাৰে ।

         এই বিশেষ দিনটোত প্ৰতি গৰাকী কিতাপ অনুৰাগীকে আমি ধন্যবাদ জনাব পাৰোঁ । আমাৰ বাবে অতি গৌৰৱৰ কথা যে অসমৰ সন্মানীয় মুখ্যমন্ত্ৰী ড° হিমন্ত বিশ্ব শৰ্মা নেতৃত্বাধীন অসম চৰকাৰে এই বৰ্ষটো গ্ৰন্থ বৰ্ষ হিচাপে ঘোষণা কৰি সকলোকে গ্ৰন্থ অধ্যয়নৰ প্ৰতি আগ্ৰহান্বিত কৰিবৰ বাবে প্ৰয়াস কৰিছে । এয়া জাতিৰ বাবে শুভ লক্ষণ । এই ছেগতে মুখ্যমন্ত্ৰী মহোদয়লৈ ধন্যবাদৰ শৰাই আগবঢ়াইছোঁ ।

 

           গ্ৰন্থ আমাৰ হৃদয়ৰ বন্তি । গ্ৰন্থ অধ্যয়ন এটা ভাল অভ্যাস । গ্ৰন্থ অধ্যয়নৰ অভ্যাসে এগৰাকী ব্যক্তিক বৌদ্ধিক আৰু মানসিক দিশত শক্তিশালী কৰি তোলে । মানুহে জীৱনত উন্নতি কৰিবলৈ হ'লে আৱশ্যক হোৱা আটাইবোৰ গুণ গ্ৰন্থ অধ্যয়নৰ জৰিয়তে প্ৰাপ্ত কৰিব পাৰে । গ্ৰন্থ অধ্যয়ন জ্ঞান অৰ্জনৰ এটা উত্তম উপায় ।

          গ্ৰন্থ আমাৰ পৰম বন্ধু । সময় অতিবাহিত কৰাৰ এটা ঘাই উপায় হৈছে গ্ৰন্থ অধ্যয়ন ৷ আমাৰ জ্ঞানৰ পৰিসৰ বৃদ্ধি কৰিবলৈ হ'লে গ্ৰন্থ অধ্যয়ন কৰিবই লাগিব । অধ্যয়ন অবিহনে কোনেও ক’তো জ্ঞান অৰ্জন কৰিব নোৱাৰে । সেয়েহে জ্ঞানীলোকে কয় গ্ৰন্থৰ বিদ্যা থুপাই থোৱা ধনৰ নিচিনা । গ্ৰন্থ অধ্যয়নৰ এটা বহুমূলীয়া গুণ আছে । গ্ৰন্থৰ সংগই আমাৰ স্বভাৱ-চৰিত্ৰৰ ওপৰত প্ৰভাৱ পেলায় । আমাৰ সকলোবোৰ ভাল অভ্যাসৰ ভিতৰত গ্ৰন্থ অধ্যয়ন হৈছে অন্যতম । আমি গ্ৰন্থ অধ্যয়নৰ অভ্যাস গঢ়ি তুলিবলৈ হ'লে আমি গ্ৰন্থাগাৰৰ সহায় ল'ব পাৰোঁ । গ্ৰন্থাগাৰ সমূহত অধ্যয়নৰ কাৰণে বহু পুথি সংগ্ৰহ কৰি থোৱা থাকে । আজিকালি সকলো বিদ্যালয়ত গ্ৰন্থাগাৰ আছে । ইয়াৰ লগতে বিভিন্ন ধৰণৰ ৰাজহুৱা নাইবা চৰকাৰী পুথিভঁৰালো গঢ়ি উঠিছে । আজিৰ সময়ত বিজ্ঞান আৰু প্ৰযুক্তিবিদ্যাৰ উন্নতিৰ লগে লগে শেহতীয়াকৈ ডিজিটেল লাইব্ৰেৰীৰো প্ৰচলন হৈছে । এই গ্ৰন্থাগাৰ সমূহত বিভিন্ন গ্ৰন্থ ই-বুক আকাৰত পোৱা যায় । আমি ডিজিটেল লাইব্ৰেৰীৰ পৰা মোবাইল , কম্পিউটাৰ আদিৰ জৰিয়তে ঘৰত বহিয়েই গ্ৰন্থ অধ্যয়ন কৰিব পৰা পৰিবেশ হৈছে । ইয়াৰ উপৰিও কিছুমান কিতাপ শুনিব পৰাকৈ digital মাধ্যমত

শ্ৰব্য ৰূপত থাকে । বিভিন্ন সহজলভ্য  এপৰ (app) যোগেদি প্ৰাপ্ত এইবোৰক অডিঅ’ বুক (audio book) বুলি কোৱা হয় । অসমীয়াত এষাৰ কথা আছে ‘যিমান পঢ়িবা সিমান শিকিবা’ । কথাতে কয় নহয় পঢ়নৰ পৰা দূৰৈৰ মানিক হাততে পোৱা যায় ।

          এই নজহা নপমা কথাবোৰে আমাক অতীতৰ কথা সোঁৱৰাই দিয়ে । বছৰৰ এটা বিশেষ দিনত অৰ্থাত ২৩ এপ্ৰিল তাৰিখত গ্ৰন্থ অধ্যয়নৰ কথা মনত পেলাই দিয়ে । আমাৰ সাহিত্যৰ বিদগ্ধ পণ্ডিত সকলে তেওঁলোকৰ জ্ঞানৰ কথাবোৰ কিতাপ আকাৰে সমৃদ্ধ কৰি থৈ গৈছে । আমি সেই সমূহ অধ্যয়ন কৰি তাৰ পৰা মাণিক বিচাৰি আমাৰ জীৱন সমৃদ্ধ কৰিব পাৰোঁ ।

         এতিয়া এই ২৩ এপ্ৰিল দিনটোৰ তাৎপৰ্যৰ কথা আমি উপলব্ধি কৰিব পাৰিছেোঁ । আজিৰ দিনতো আমাৰ মৰমৰ ছাত্ৰ/ছাত্ৰীসকল মোবাইল আসক্ত হৈ নিজৰ ভৱিষ্যতটো অন্ধকাৰ দিশে আগুৱাই লৈ যোৱা বুলি ভবিবৰ থল আছে । গতিকে আমি শিক্ষক-শিক্ষয়িত্ৰী , অভিভাৱক-অভিভাবিকাসকল , অন্যান্য সংঘ-সংস্থা-সংগঠন সকলোৱে এই বাৰ্তাটো তেওঁলোকৰ মাজলৈ লৈ গৈ তেওঁলোকক গ্ৰন্থ অধ্যয়নৰ প্ৰতি আগ্ৰহী কৰি তুলিবলৈ আমি যত্নপৰ হ'ব লাগিব । ছাত্ৰ-ছাত্ৰী সকলক গ্ৰন্থ অধ্যয়নৰ প্ৰতি আগ্ৰহশীল কৰি তুলিবৰ বাবে বিদ্যালয় সমূহত নতুন পুথিভঁৰাল নিৰ্মাণ কৰিছে । তাত উপযুক্ত পৰিমাণে বিভিন্ন ধৰণৰ কিতাপো যোগান ধৰিছে । এইটো এটা আদৰণীয় পদক্ষেপ । মাথোন আমি হাতে-কামে লাগি সকলোৱে লক্ষ্যত উপনীত কৰোৱাত হাত উজান দিব লাগে । নহ'লে হয়তো আমি আমাৰ আকাংক্ষিত ফল লাভ কৰিব নোৱাৰিম । হয়তো এদিন সকলোৱে আমাক এৰি যাব । কিন্ত কিতাপে এৰি নাযায় ; কিতাপৰ কাহানিও মৃত্যু নহয় । ই পৰম ব্ৰহ্ম । গতিকে এই পৰমব্ৰহ্ম স্বৰূপ অমূল্য গ্ৰন্থ সমূহৰ পৰা জ্ঞান লাভ কৰি আমি এজন সফল মানুহ হোৱাত হাত উজান দিওঁ আহক । আমাৰ শিকাৰু সকলকো গ্ৰন্থ অধ্যয়ণৰ প্ৰতি আগ্ৰহী কৰি তোলা । তেতিয়াহে হয়তো এই দিৱসটোৰ তাৎপৰ্য অটুত থাকিব । জয়তু চিৰ চেনেহী মোৰ ভাষা জননী ।

হেমেন চন্দ্ৰ হাজৰিকা 

সহঃ শিক্ষক 

বিৰোগাঁও মজলীয়া বিদ্যালয় 

ৰামপুৰ শিক্ষাখণ্ড ।

One attachment • Scanned by Gmail