নেহৰু খুড়া | Poem by Dipamani Daimari

নেহৰু খুড়া

  

অতিকে' মৰমৰ আমাৰ নেহৰু খুড়া, জনালোঁ তোমাক প্ৰণিপাত, 

নেদেখা দূৰণিৰপৰা দিয়াহি আমাক শত-কোটি আশীৰ্বাদ ৷

তোমাক সেৱা জনাই আৰম্ভ কৰিলোঁ তোমাৰ চমু জীৱনী,

অজানিতে হ'ব পাৰে ভুল, তাৰবাবে ক্ষমা বিচাৰছোঁ চৰণত প্ৰণামি ৷

নেহৰু খুড়াৰ সম্পূৰ্ণ নাম-- পণ্ডিত জৱাহৰলাল নেহৰু, 

তেখেতক আমি সকলোৱে শ্ৰদ্ধাৰে সোঁৱৰোঁ ৷

জন্ম হৈছিল ১৮৮৯ চনৰ ১৪ নৱেম্বৰত, উত্তৰ প্ৰদেশৰ চহৰ এলাহাবাদ,

পিতৃ মতিলাল নেহৰু, প্ৰতিষ্ঠিত আইনজ্ঞ আৰু ৰাজনীতিবিদ ৷

মাতৃৰ নাম আছিল নেহৰু স্বৰূপৰাণী,

তেওঁ আছিল এগৰাকী মহাধৰ্মপৰায়ণা গৃহিণী ৷

স্কুলীয়া শিক্ষা লাভ কৰে বিলাতৰ বিদ্যালয়ত, 

কেমব্ৰিজৰ ট্ৰিনিটি মহাবিদ্যালয়ত ভৰ্তি হৈছিল ১৯০৭ চনত ৷

১৯১০ চনত তিনিটা বিষয়ত সন্মানসহ লাভ কৰিছিল ডিগ্ৰী,

সেই সময়তে নেহৰু খুড়াই ভ্ৰমিছিল ফ্ৰান্স  আৰু জাৰ্মানী  ৷

তাৰ পাছত 'ইনাৰ টেম্পল'ৰ পৰা বেৰিষ্টাৰী ডিগ্ৰী লৈ,

১৯১২ চনত সগৌৰৱে উভতি আহিছিল নিজৰ দেশলৈ ৷

 

কৰ্মজীৱন তেখেতৰ আইন ব্যৱসায়, 

এলাহাবাদ হাইক'ৰ্টত,

নেহৰু খুড়াই পাছত মনোনিৱেশ কৰিলে 

ভাৰতীয় জাতীয় কংগ্ৰেছত ৷

১৯১৬ চনত খুড়াই বিবাহপাশত আৱদ্ধ হ'ল 

কমলা কৌৰৰ সৈতে,

গান্ধীজীৰ স'তে খুড়াৰ প্ৰথম সাক্ষাৎ হৈছিল 

১৯১৬ চনতে ৷

১৯১৭ চনত খুড়াই কৰিছিল 

আন্দোলন 'হোমৰুল',

১৯২১ চনত তেখেতে পালন 

কৰিছিল হৰতাল ৷

হৰতাল পালন কৰি তেখেতে প্ৰথমবাৰৰ বাবে 

কাৰাবাস খাটিলে,

১৯৩০ চনত লোণ আইন ভংগ আন্দোলনত যোগদান কৰি 

ছমাহ কাৰাবাসতে কটালে ৷

 

কৃষক সন্মিলনত যোগদানৰ অভিযোগত 

খাটিলে কাৰাদণ্ড পুনৰ দুবছৰ,

১৯৩৬ চনৰ এপ্ৰিলত তেওঁ সভাপতি 

নিৰ্বাচিত হৈছিল লক্ষ্ণৌ কংগ্ৰেছৰ ৷

 

১৯৪০ চনত খুড়াই পুনৰ এবছৰ কাৰাবাস খাটিলে 

কৰি সত্যাগ্ৰহ আন্দোলন,

১৯৪২ চনত 'ভাৰত ত্যাগ' আন্দোলনত ভাগ লৈ 

লভিলে কাৰাৰুদ্ধ জীৱন ৷

 

খুড়াৰ একমাত্ৰ কন্যা ইন্দিৰা গান্ধী, 

তেখেতৰ অতিকে' মৰমৰ,

জেলত থাকোঁতে জীয়কলৈ লিখা চিঠিখনৰেই গ্ৰন্থৰ ৰূপ- 

'এ লেটাৰ টু হিজ ডটাৰ' ৷

 

১৯৪৭ চনৰ ১৫ আগষ্টত ভাৰতবৰ্ষই 

কৰিলে স্বাধীনতা লাভ,

এই বৰ্ষৰেই ১৯ আগষ্টত খুড়াই গ্ৰহণ কৰিলে 

স্বাধীন ভাৰতৰ প্ৰথমজন প্ৰধানমন্ত্ৰীৰ বাব ৷

 

১৯৫৫ চনত তেখেতে লাভ কৰিলে 

'ভাৰতৰত্ন বঁটা' -- দেশৰ সৰ্বোচ্চ সন্মান,

দেশৰ কাৰণে খুড়াই উছৰ্গা কৰিলে 

তেখেতৰ গোটেই জীৱন ৷

 

দিল্লীৰ নিজ বাসভৱনত মৃত্যু হয় তেওঁৰ.. 

১৯৬৪ চনৰ ২৭ মে'ৰ দিনা,

নেহৰু খুড়াৰৰ মৃত্যুত সমগ্ৰ বিশ্বতে 

বৈ গ'ল শোকৰ বন্যা ৷

 

নেহৰু খুড়াই ভাল পাইছিল 

গোলাপ ফুল আৰু শিশু,

সেয়েহে অকণিসকলেও মাতিছিল 

তেখেতক 'খুড়া নেহৰু' ৷

 

এইগৰাকী মহান ব্যক্তিৰ জন্মদিনটো 

হ'ল ১৪ নৱেম্বৰ,

সেয়েহে আমি পালন কৰোঁ 'শিশুদিৱস' হিচাপে 

কৰি মহা আড়ম্বৰ ৷

 

******************************************************* 

দীপামণি দৈমাৰী

সহ:শিক্ষয়িত্ৰী, বালিঝাৰ এম ই মাদ্ৰাছা

শিক্ষাখণ্ড: ছমৰীয়া, কামৰূপ।

অলংকৰণ :- পল্লবী পাঠক