পোহৰ (অনুগল্প) | Assamese Microstory by Harimati Kalita

পোহৰ 
                                     

                            

       বাইদেউ, উঠক। এজন পুলিচ অফিচাৰে দীপাক আগভেটি ধৰি ক'লে। মোৰ বাইকখনেৰে আপোনাৰ স্কুলত থৈ আহিম। উঠকচোন, ইমান বেগেৰে খোজ কাঢ়িছে, একেবাৰে দৌৰা যেন পায় । দীপা কিছু সময়ৰ বাবে থমকি ৰ'ল। তাৰপিছত তাই ক'লে, নাই নাই, নালাগে। অলপ গ'লেই মই পাম ।

             পুলিচ অফিচাৰ জনে বাইকৰ পৰা নামি দীপাক ভৰি চুই সেৱা কৰি ক'লে - বাইদেউ, মই আপোনাৰ ছাত্ৰ অলক । আপুনি আমাৰ ঘৰলৈ গৈ ভণ্টি আৰু মোক যদি স্কুললৈ নানিলেহেঁতেন, তেন্তে আজিও আমি খৰি বিক্ৰী কৰি খাই থাকিব লাগিলহেঁতেন । দেউতাৰ ভৰি এখন বিকল বাবে মানুহে  'খোৰা ' বুলি  ইতিকিং কৰিছিল। গাৱঁৰ মানুহে আমাক খৰি  বিচাৰিবলৈ পঠাইছিল । কিন্তু কোনেও পঢ়াৰ কথা কোৱা নাছিল । সেই হাবিখনৰ পৰা খৰি বিচাৰি থাকোঁতে একমাত্ৰ আপুনিয়েই আমাক প্ৰকৃত পথৰ সন্ধান দিছিল। 

            বাইদেউক ভাল কথাটো কোৱাই নাই। ভণ্টি এতিয়া এ, এন, এম ( নাৰ্ছ ) । মই পুলিচ অফিচাৰ । আমি এটা ভাল ঘৰ বনাইছো। বাইদেউ, আপোনাক আমি এতিয়াও  সাক্ষাৎ ভগৱান বুলি স্মৰণ কৰি আহিছোঁ । এদিন আপুনি আমাৰ ঘৰলৈ যাবই লাগিব । দীপাই কিছু সময়ৰ বাবে আবেগিক হৈ পৰিল।

*****************

হৰিমতী কলিতা 

প্ৰধান শিক্ষয়িত্ৰী

৫৭৯ নং ছয়গাঁও প্ৰাথমিক বিদ্যালয

শিক্ষাখণ্ড: ছয়গাঁও

অলংকৰণ :- তন্দ্রা দে