ভোগৰ বিহু ভোগালী 
অসমৰ বিহু তিনিটি আমাৰ অতিকে আপোন,
অসমীয়া সমাজ-জীৱনৰ ই হ'ল এখন দাপোণ ৷
বিহু আমাৰ জাতীয় উৎসৱ বাপতি-সাহোন,
সকলো অসমীয়াই বিহুক কৰোঁহো প্ৰণাম ৷
তিনিটি বিহুৰ ভিতৰত মাঘ বিহু হ'ল ভোগৰ বিহু ,
মাঘ বিহুত খাওঁ আমি নানা পিঠা-লাৰু ৷
উৰুকা উপলক্ষে সজা হয় ভেলাঘৰ আৰু মেজি,
উৰুকাৰ দিনা ভোজ-ভাত খাওঁ গঞা ৰাইজে মিলি ৷
উৰুকাৰ পিছদিনা ৰাতিপুৱাই মেজি জ্বলোৱা হয়,
মেজিৰ তলত আঁঠু লৈ ৰাইজে ভগৱানৰ আশিস লয় ৷
মেজিৰ ছাঁইৰ ক'লা ফোট পিন্ধে গঁঞা ৰাইজে ,
সেই ছাইৰ ক'লা ফোট গৰুকো পিন্ধাই দিয়ে ৷
আৰু দিয়ে তেল সানি..
নিমখ দিয়ে খুৱাই ,
গৰুবোৰে আনন্দতে ডেও দি ফুৰে
বন্ধনৰপৰা মুকলি হৈ।
তাৰ পিছদিনা ৰাতিপুৱাই গা-পা ধুই ,
সৰুৱে ডাঙৰৰ আশিস লয় দুখনি চৰণ চুই ৷
ডাঙৰে সৰুক দিয়ে --
আশিস আৰু মৰম,
তাৰপিছতেই আৰম্ভ হয়
চাহ-জলপান গৰম গৰম ৷
বিভিন্ন ধৰণৰ পিঠা-লাৰুৰে
কাঁহী দিয়ে ভৰাই ,
দৈ-চিৰা-গুৰ, সান্দহ আদিৰে খাওঁ উদৰ পূৰাই ৷
মাঘ মাহত দূৰ হয় কাতি মাহৰ আকাল ,
সকলোৰে ঘৰত উপচি পৰে সোণগুটিৰ ভঁৰাল ৷
মাঘ যে আমাৰ ভোগৰ বিহু
খাদ্য খাওঁ টকালি-টকালি ,
সেয়েহে ইয়াৰ আন এটা নাম
বিহু ভোগালী ৷
বাপতি-সাহোন এই বিহুটিক
ৰাখিম আমি জীয়াই ,
নহ'লে যে লজ্জানত হ'ব লাগিব
আমি সকলো অসমীয়াই ৷
++++++++++++++++++++++
সহ শিক্ষয়িত্ৰী,
বালিঝাৰ এম. ই. মাদ্ৰাছা
শিক্ষাখণ্ড: ছমৰীয়া
অলংকৰণ :- পল্লবী পাঠক
0 Comments