বিজ্ঞান দিৱসৰ চিন্তাৰ মানসিকতা | Assamese Article by Anima Das

 বিজ্ঞান দিৱসৰ চিন্তাৰ মানসিকতা

 

       বিজ্ঞান দিৱসটো ১৯৮৭ চনৰ পৰাই ২৮ ফেব্ৰুৱাৰী তাৰিখে সমগ্ৰ দেশজুৰি ৰাষ্ট্ৰীয় বিজ্ঞান দিৱস হিচাপে উদযাপন কৰি অহা হৈছে | এই দিনটোত ১৯২৮ চনত ভাৰতৰ খ্যাতনামা বিজ্ঞানী নোবেল বঁটা বিজয়ী চি ভি ৰমনে তেওঁৰ ৰমন পৰিঘটনা আৱিস্কাৰ কৰিছিল | ১৯৮৬ চনত ৰাষ্ট্ৰীয় বিজ্ঞান আৰু প্ৰযুক্তিবিদ্যা সহযোগ আয়োগে ( NCSTC ) এই দিনটো ৰাষ্ট্ৰীয় বিজ্ঞান দিৱস হিচাপে স্বীকৃতি প্ৰদান কৰিবলৈ ভাৰত চৰকাৰৰ ওচৰত প্ৰস্তাৱ আগবঢ়াইছিল | তাৰ পিছৰ পৰাই   একোটাকৈ কেন্দ্ৰীয় বিষয় লৈ বিজ্ঞান দিৱস উদযাপন কৰি অহা হৈছে | প্ৰথম ১০ নৱেম্বৰ ২০০২ চনত বিশ্বজুৰি বিজ্ঞান দিৱস হিচাপে পালন কৰে UNESCO ৰ সহযোগত |

        বৰ্তমান সময়ত প্ৰতিখোজে খোজে বিজ্ঞানৰ জয় যাত্ৰা | সমাজ জীৱনৰ প্ৰতি খলপতে বিজ্ঞান জড়িত হৈ পৰিছে | পৃথিৱী নামৰ আমাৰ গ্ৰহটি আজি বিজ্ঞান আৰু প্ৰযুক্তিবিদ্যাৰ উৎকৰ্ষৰে                    জিলিকি উঠিছে | বিজ্ঞানে প্ৰদান কৰিছে জীৱনৰ অন্য এক আয়তন | যদিও চি ভি ৰমনৰ আৱিস্কাৰ সুঁৱৰি আমি তেওঁৰ অৰিহণাৰ কথা স্মৰণ কৰিবলৈ গোটেই দেশতে বিজ্ঞান দিৱস পালন কৰো , তথাপি এই কথা আমি প্ৰত্যেকেই অনুভৱ কৰো যে ইয়াৰ মূল উদ্দেশ্য এটাই ---বিজ্ঞানক জনপ্ৰিয় কৰা আৰু সমাজত ইয়াৰ ব্যৱহাৰ | আজিৰ সময়ত এতিয়াও ছানি ধৰি থকা কিছুমান পুৰণি ৰীতি - নীতি , কুসংস্কাৰ  অন্ধবিশ্বাস সমাজৰপৰা বিদায় দি বৈজ্ঞানিক মতবাদ প্ৰতিষ্ঠিত কৰাই হ'ল বিজ্ঞান দিৱসৰ উদ্দেশ্য | সমাজৰ প্ৰতি গৰাকী ব্যক্তিক বৈজ্ঞানিক মানসিকতাৰে গঢ় দিব নোৱাৰিলে নতুন নতুন বৈজ্ঞানিক আৱিস্কাৰেও সমাজক প্ৰকৃতাৰ্থত আগুৱাই লৈ যাব নোৱাৰে | এই দিৱস উদযাপনে নি:সন্দেহে বিজ্ঞান চৰ্চাৰ প্ৰতি সৰ্বসাধাৰণ মানুহৰ       আগ্ৰহ- অনুপ্ৰেৰণা বৃদ্ধি কৰি , সমাজত বৰ্তি থকা অন্ধবিশ্বাস , কুসংস্কাৰ  ,পশ্চাদপদ ধ্যান- ধাৰণাৰ বিপৰীতে যুক্তিবাদীচিন্তা, বিজ্ঞানসন্মত প্ৰচাৰ আৰু প্ৰসাৰত অৰিহণা যোগায় | 
         

        বিজ্ঞান অধ্যয়ন কৰা কালত বিষয়টোৰ লগত বিজ্ঞানীজনৰ নিজৰ ব্যক্তিগত সুখ - দুখ , আশা - আকাঙ্খা আদি জড়িত কৰিব নোৱাৰে | আগতীয়াকৈ কোনো সিদ্ধান্ত নলৈ বিজ্ঞানীয়ে বিজ্ঞান অধ্যয়ন কৰে | তেওঁলোকৰ কৌতুহলৰ প্ৰতি কৌতুহল জন্ম হয় | মহান মহান বিজ্ঞানী সকলৰ জীৱনীসমূহ পঢ়িলে এইবোৰ কথা অনুধাৱন কৰিব পাৰি | আকৌ বিজ্ঞানৰ আন এটা লক্ষ্য হল যুক্তি | যিয়ে প্ৰকৃতিৰ ৰহস্য উন্মোচন কৰিব খোজ যুক্তিযুক্ততাৰে | 

        অলৌকিকতাবাদ তথা ধৰ্মতত্বৰ বিপৰীতে বিজ্ঞানে 'পৰম সত্যৰ চৰম সীমাত' ইতিমধ্যে উপনীত হৈছোগৈ বুলি আগতীয়াকৈ ধৰি নলৈ,  'ৰহস্যৰ সমাধান হোৱা নাই কিন্তু ভৱিষ্যতে যিবোৰৰ সমাধান সম্ভৱ' , এনে আশাবাদী মনোভাৱ লৈ বিজ্ঞান আগবাঢ়িছে | বৈজ্ঞানিক মানসিকতা বা বৈজ্ঞানিক দৃষ্টিভংগী হ'ল এটা মনৰ গুণ | সেয়ে কোনো এটা বিশিষ্ট  সূত্ৰৰে ইয়াক বান্ধিব নোৱাৰি | বৈজ্ঞানিক মানসিকতা সম্পন্ন হ'বলৈ হ'লে জ্ঞানৰ সকলো শাখাতে ইয়াৰ প্ৰয়োগ অপৰিহাৰ্য | বিজ্ঞানৰ মাথোন তত্বই যঠেষ্ট নহয় পৰীক্ষা পাতিৰো স্থান ইয়াত সমানেই গুৰুত্বপূৰ্ণ | যুক্তিসংগত নহ'লে বিজ্ঞানে কোনো এটা কাম কৰিবলৈ আগবাঢ়ি নাযায় | বৈজ্ঞানিক মানসিকতাৰ কথা কোৱা সহজ কিন্তু ইয়াক মনত ৰখা আৰু নিৰ্দেশ মানি চলা অতি কঠিন | 

         আচলতে, আধুনিক সভ্যতাতহে বিজ্ঞানে নিজৰ অগ্ৰণী ভূমিকা নিগাজী কৰিছে|  কোনো কোনো দেশ,সমাজ  আৰু অৰ্থনৈতিক জীৱনত বিজ্ঞানে বহু উচ্চ শিখৰলৈ গৈছে, কিন্তু তাৰ বিপৰীতে বহুত পাৰিপাৰ্শ্বিক ধ্বংস হোৱা পৰিলক্ষিত হৈছে | যাৰ ফলত অক্সিজেনৰ অভাৱত ডাঙৰ ডাঙৰ মহানগৰবিলাকত জনসাধাৰণে কৃত্ৰিম অক্সিজেন অৰ্থৰ বিনিময়ত গ্ৰহণ কৰি জীয়াই থাকিব লগা হৈছে | বিজ্ঞানে কৃত্ৰিম উপগ্ৰহবোৰৰ সহায়ত উদ্ভাৱন কৰিবলৈ লোৱা পদক্ষেপে সমাজৰ দ্ৰুত গতিত উন্নতি কৰিছে |  উন্নত যাতায়তৰ বাবে পৃথিৱীখন সংকুচিত হৈছে | কম্পিউটাৰ, মোবাইল আদিয়ে মানুহৰ কায়িক শ্ৰম লাঘৱ কৰাৰ লগতে ৰবটৰ দ্বাৰা বিপদ সংকুল কামবোৰ কৰিবলৈ সক্ষম হৈছে | কিন্তু এতিয়াও ভাব হয় বিজ্ঞানে মানুহৰ সমাজ জীৱনলৈ যাবলৈ যেন বহুত বাকী, যাৰ ফলত ডাইনী হত্যা, তন্ত্ৰ - মন্ত্রৰ ব্যৱহাৰ , ধৰ্মৰ প্ৰতি মানুহৰ অন্ধবিশ্বাস , বলি বিধান .... এতিয়াও চলি আছে | 
         

*************************************

নাম - অনিমা দাস 
পদবী - প্ৰধান শিক্ষয়িত্ৰী 
ছয়গাঁও আঞ্চলিক প্ৰাথমিক বিদ্যালয় 
শিক্ষাখণ্ড - ছয়গাঁও 
মো: নং - ৭০০২৭১৭৩৮৭

 

অলংকৰণ :- তন্দ্রা দে