Labels

মণিমালাৰ সপোন l Assamese Poem by Sweety Bezbaruah

 মণিমালাৰ সপোন       

মণিমালাই সপোনত ফুৰিব খুজিলে 

ঘৰৰ হাঁহজনীচোন ওচৰলৈ আহিলে !

" উঠা , উঠা মণিমালা , মোৰেই পিঠিত ,

দুয়ো গৈ ফুৰি আহোঁ চম্পাৱতীত ।। "


জাঁপ  মাৰি মণিমালা পিঠিত উঠিল ,

মেঘৰ বুকুৱেদি দুয়ো উৰি গৈ থাকিল ।

পাহাৰ - পৰ্বতে আগুৰা বিশাল পথাৰ ,

গছ - গছনিৰে ভৰা সেউজীয়া ধৰা সুন্দৰ ।।


সোঁমাজত আছে এটি বিশাল পুখুৰী ,

সকলোৱে কয় , সেয়াই চম্পাৱতী ।

মাছ আৰু হাঁহৰ খেল-ধেমালি ,

দেখি বৰ ভাল লাগিল মণিমালাজনীৰ ।।


চম্পাৱতীৰ পাৰত মণিমালা বহিল , 

হাঁহজনী গৈ পানীত নামিল ।

সমনীয়া হাঁহৰ লগত সখা পাতিলে , 

মণিমালাই মাছৰ লগত খেলিবলৈ ল'লে ।।


" উঠা , মাজনী ৰাতিপুৱা হ'ল ,

স্কুললৈ যোৱাৰ সময় হ'ল "_

মাকৰ মাতত মণিমালাৰ টোপনি ভাগিল ,

পুৱাৰ বেলিটোৱে ক'লে " সপোন ভাগিল ।" 


চুইটি বেজবৰুৱা , 

জিলা আঁচনি বিষয়া ( বিকল্প শিক্ষা আৰু মাধ্যমিক শিক্ষা ) 

সমগ্ৰ শিক্ষা , কামৰূপ l

Post a Comment

0 Comments