অসমীয়া কবিতা, নাৰী, অঞ্জু ৰয় বৈশ্য, ৩য় বছৰ ৩য় সংখ্যা,

 নাৰী

তাই নাৰী ―

আনৰ বাবে তাই অৱলা ;

" তই পাৰিবিনে ? "  " তই কৰিবিনে ? "

― প্ৰশ্নবোৰে 

কৰি তুলিলে তাইক বজ্ৰকঠিন ।

কাঁইটীয়া বাটেৰেও তাই 

বুলিব পাৰে বাট

এপাহি গোলাপ হ'লেও 

কাঁইটৰ মাজতে তাইৰ অৱস্থান ।

তাই অনন্যা -

তাইৰ সুকোমল মাতে পৃথিৱী জুৰায় ,

তাইৰ আদৰ-সাদৰে ঘৰখন শুৱায় ,

মাতৃত্বৰ উমাল মৰমেৰে আৱৰি ৰাখে ধৰণী

ৰজা কিম্বা প্ৰজা 

তাইৰ হাতৰ অমৃত পান কৰি ধৰুৱা সকলো

জীয়ৰী-বোৱাৰী , ভগ্নী-পত্নী ৰূপেৰে

সকলোতে তাই ভাও দি যায় নিখুঁত অভিনেত্রীৰ ।

সকলোকে দি যায় 

জীৱন জিনাৰ অনুশীলন ,

তাই আগ্নেয়গিৰি -

ক্ষণে সুপ্ত , ক্ষণে জাগ্ৰত

দুৰ্বলী নহয় তাই 

ধৈৰ্য্য-সহ্যৰ এক প্ৰতীকী মাথো ,

দুৰ্গা-লক্ষ্মীৰ স্বৰূপ তাই , 

দহো হাতৰ শক্তিৰে শক্তিৱন্ত নাৰী ।

তাইৰ ভেশ অনেক ― মায়াবী

পানীৰ দৰে তাইৰ ৰূপান্তৰ ,

শিলৰ দৰে কঠিন ,

নহয় তাই অৱলা -

তাই অনন্যা , তাই শক্তিৰূপা ,

যুগে যুগে কৰি আহিছে

এক অনন্য যাত্রা ―

ভাগৰা নাই তাই

ভাগৰি নপৰে কদাপি ,

অনন্ত কাললৈ তাইৰ দৃষ্টি

কাৰণ ― তাই নাৰী ।

অঞ্জু ৰয় বৈশ্য

সহ শিক্ষয়িত্রী ,

ছমৰীয়া উচ্চ মাধ্যমিক বিদ্যালয়

শিক্ষাখণ্ড - ছমৰীয়া ।