ধাৰাবাহিক লেখা, ছয়গঞা ভাষাৰ চমু আলোচনা ( নৱম খণ্ড ), দীপাংকৰ ঠাকুৰীয়া

  ছয়গঞা উপভাষাৰ চমু আলোচনা ( নৱম খণ্ড )

মূল ছয়গঞা ভাষা :-

       ছয়গাঁও অঞ্চলৰ কেইবাটাও আঞ্চলিক ৰূপৰ আলোচনা ইতিমধ্যে কৰা হ’ল । এই আলোচনাৰ পৰা এয়া নিশ্চিত হব পৰা যায় যে কামৰূপী ভাষাৰ অন্তৰ্গত হ’লেও ছয়গঞা লোক - ভাষা বৈচিত্ৰপূৰ্ণ । এই লোক ভাষাৰ আঞ্চলিক ৰূপ সমূহেই  ইয়াৰ বৈচিত্ৰতাৰ মুল কাৰণ । কামৰূপী উপভাষাৰ বৈশিষ্টসমূহ সহিতে ছয়গঞা ভাষাটো কিছু সুকীয়া বৈশিষ্টৰে একক । এই বৈশিষ্টসমূহ উচ্চাৰগত ধ্বনি , ৰূপ ,  শব্দাৱলী , কথন ভংগী আদিৰ দ্বাৰা প্ৰকাশিত হয় । এই বৈশিষ্টসমূহ অতি চমুকৈ আলোচনা কৰা হ’ল ।

(ক) ধ্বনিগত বৈশিষ্ট

       মূল ছয়গঞা ভাষাৰ স্বৰ আৰু ব্যঞ্জন ধ্বনিৰ ব্যৱহাৰ এনেধৰণৰ –

উদাহৰণস্বৰূপে -

দ্বিৱস্বৰ :-

       ছয়গঞা কথিত ভাষাৰ ক্ষেত্ৰত যুক্ত স্বৰধ্বনি বোৰ সমীভৱনৰ জড়িয়তে সৰলীকৃত নহ'লে দ্বিৱস্বৰলৈ পৰিৱৰ্তন হোৱা পৰিলক্ষিত হয় ।

উদাহৰণ স্বৰূপে :-

             ছয়গঞা ৰূপ                  মান্য অসমীয়া

     

/ওই/       দৈ                                দৈ

              (দওই)    

/ওউ/      মৌ                               মৌ

              (মওউ)

/এউ/      সেউলি                         শেৱালি      

/আঅ/    গাঅ                             শৰীৰ

/আও/     দাওকাতা                     অঘাইটং

/উই/        উই                              উই পোক

ছয়গাঁৱৰ ভাষাত স্বৰৰ বিভিন্ন পৰিৱৰ্তন :-

       অপনিহিতিৰ ফলস্বৰূপে আগৱাঢ়ি অহা ‘ই’ বা ‘উ’ তাৰ কাষৰ স্বৰধ্বনিৰ সৈতে আভ্যন্তৰীণ সন্ধিত মিলিত হৈ স্বৰধ্বনিৰ যি পৰিৱৰ্তন ঘটায় , তাকেই অভিশ্ৰুতি বোলে । অৰ্থাৎ অপনিহিত ‘ই’ বা ‘উ’ য়ে যেতিয়া ইয়াৰ কাষৰ স্বৰবৰ্ণৰ শব্দ প্ৰভাৱিত কৰে আৰু ইয়াৰ সৈতে মিহলি হয় , ইয়াকে অভিশ্ৰুতি বোলে । ছয়গঞা কথোপকথনত অভিশ্ৰুতিৰ বাবে মান্য অসমীয়াৰ শব্দৰ স্বৰধ্বনিৰ পৰিৱৰ্তন হোৱা দেখা যায় । যেনে :-

                      ছয়গঞা ৰূপ                    মান্য ৰূপ

(১) অ > ও     কপোনি (কঅ’পওনই)         কঁপনি

                      মদহি (মঅ’দঅ’হই)             মদাহি

(২) ও > উ      কুমুৰা (কউমউৰঅআ)       কোমোৰা

(৩) অ > উ     তুপুনি (তউপউনই)              টোপনি

(৪) উ > ই       বিজিলি (বইজইলই)           বিজুলী

(৫) আ > এ’    বিলেহী (বইলইহই)              বিলাহী

(৬) অ > আ    দামাৰা (দআমআৰআ)        দমৰা

স্বৰভক্তি :-

           ছয়গঞা ৰূপ                       মান্য ৰূপ

   ই :     কিৰিপিন                             কৃপণ

   এ :    মেলেচ                                 ম্লেচ

   উ :     ভুৰু                                     ভ্ৰু

ইংৰাজী শব্দত স্বৰভক্তিৰ ব্যৱহাৰ -

  গ্লাচ> গেলাচ 

  প্লেট> পিলেত

  ব্লাউজ> বুলাজ

  ক্লাচ> কিলাচ

অপনিহিতি :-

   মান্য ৰূপ                       ছয়গঞা ৰূপ

   বাপেক                          বাপিয়াক

   বোৱাৰী                          বইৰি                                              

স্বৰধ্বনি বিপৰ্যয় :-

   মান্য ৰূপ                        ছয়গঞা ৰূপ

   ৰুমাল                            উৰমাল   

   নহৰু                              নেহুৰ    

   শতৰু                              সতুৰ

দীপাংকৰ ঠাকুৰীয়া

গৱেষক ছাত্ৰ ,

গৱেষণাৰ বিষয় – লোক সংস্কৃতি

গুৱাহাটী বিশ্ববিদ্যালয় ।