অসমীয়া কবিতা, ব্ৰহ্মপুত্ৰ, শ্ৰীশেৱালি বৈশ্য, ৪ৰ্থ বছৰ ৪ৰ্থ সংখ্যা

 ব্ৰহ্মপুত্ৰ

ব্ৰহ্মাৰ পুত্ৰ তুমি নাম ব্ৰহ্মপুত্ৰ 

ওলাইছে জলধাৰা তোমাৰ মানস সৰোবৰৰ পৰা ৷

পূবৰ পৰা পশ্চিমলৈ বৈ গৈছা অসমৰ মাজেৰে 

কত জান-জুৰি , নৈ-উপনৈ আহি মিলিছেহি তোমাৰ বুকুত ৷

নানা নামে মাতে তোমাক নানান দেশত ,

অসমত লুইত , তিব্বতত য়াৰলং ষ্টাংপো 

চিয়াং নামে জনাজাত অৰুণাচলত ৷

 কত জাতি-উপজাতিৰ বসতিস্থল

             তোমাৰ দুয়োপাৰ ,

সভ্যতা-সংস্কৃতিৰ গৌৰৱভূমি

            সমন্বয়ৰ স্থল । 

অসমীয়াৰ প্ৰেৰণা , তুমি ব্ৰহ্মপুত্ৰ

কত বীৰৰ বীৰত্বৰ কাহিনী

         তোমাতেই বিজড়িত ৷

তোমাৰ বুকুৱেদি ডিঙা মেলি

কত পাহোৱাল ডেকাই

আজিও চিঞৰি গাই যায়

'লুইতৰ পাৰৰ আমি ডেকা ল’ৰা

         মৰিবলৈ ভয় নাই ৷'

খৰালি তোমাৰ শান্ত-সৌম্য মূৰ্ত্তি

    বাৰিষা বিভীষিকাময় ,

শত-সহস্ৰ গাঁও-ভূই তোমাতেই লীন হয় ৷

বাৰিষা তোমাৰ বুকুত নাচে 

  বিশাল তৰঙ্গৰ জলধাৰা ,

দুয়োপাৰ প্লাৱিত কৰি ধন-জনৰ 

     বিস্তৰ ক্ষতি কৰা ৷

তোমাৰ বুকুতেই পৰৰাষ্ট্ৰই নদীবান্ধ দিয়াৰ অভিযোগ ,

সময়ে সময়ে হৈ পৰা তুমি অসমীয়াৰ অভিশাপ স্বৰূপ ৷

যদিহে কৰিব পৰা নাযায় ব্ৰহ্মপুত্ৰক নিয়ন্ত্ৰণ

চিৰদিন আমি নিয়তিৰ হাতৰ পুতলা হৈ ৰ’ম !  

শ্ৰীশেৱালি বৈশ্য  

প্ৰধান শিক্ষয়িত্ৰী ,

শুৱালকুছি সনাতন বালিকা প্ৰাথমিক বিদ্যালয় ৷

হাজো শিক্ষাখণ্ড