অসমীয়া কবিতা I পৰম আত্মা I শ্ৰীসৰস্বতী দত্ত I ৬ষ্ঠ বৰ্ষ, ১ম সংখ্যা

 পৰম আত্মা 

হে প্ৰাণৰ শিল্পী জুবিন গাৰ্গ , তুমি পৰম আত্মা ,

তোমাৰ গানকে তোমাক শুনাই 

সাগৰে দিলে আলফুলে শুৱাই ,

আকাশী পথেৰে, জোনাকী বাটেৰে ,

চিলা চিলা হৈ উৰুৱাই ,

ৰ'দ আৰু বতাহৰ কতনো ঢৌ ,

বাটৰে শেষতে বাট চাই চাই 

হেজাৰ জনতাৰ 

নিদ্ৰাবিহীন ঢৌ ,

মায়াবিনী ৰাতিৰ প্ৰচণ্ড ঢৌ ।

জোন ! নিৰৱে থাকিব নোৱাৰিলে ,

ধুৱাই দিলে তোমাৰ নিথৰ দেহ ,

চকুলোৰ বৰষুণ , 

ৰামধেনুৱে আঁকি দিলে 

হেজাৰ ঢৌ ।

 ভাগৰুৱা আত্মাই শান্তি বিচাৰি পোৱা 

ক্ষণিকৰ ঠাইখন হ'ল , 

তোমাৰ চিৰশান্তিৰ ,

শেষ ঠিকনা সোণাপুৰ ৷

হে বাদশ্বাহ , সম্ৰাট 

তোমাৰ হাতৰ আঙুলিত ,

ইজিপ্তৰ ৰজাৰ ঠিকনা ।  

হে মহান শিল্পী , 

তুমিটো নাছিলা সাধাৰণ আত্মা ,

তুমি আছিলা ,

ভগৱানে পঠোৱা পৰম আত্মা ,

যাৰ বাবে আজি তোমাৰ সমাধিস্থলী 

ৰূপান্তৰ হৈছে পবিত্ৰ তীৰ্থভূমিলৈ ।

হে প্ৰাণৰো প্ৰাণৰ দেৱদূত জুবিন গাৰ্গ 

শত কোটি প্ৰণাম তোমাক । 

শ্ৰীসৰস্বতী দত্ত I

অৱসৰী প্ৰধান শিক্ষয়িত্ৰী I

পি এম শ্ৰী ৰামদিয়া আদৰ্শ প্ৰাথমিক বিদ্যালয় I

শিক্ষাখণ্ড : হাজো I