জুবিন গাৰ্গঃ সাগৰত হেৰাই যোৱা এক উজ্জ্বল নক্ষত্ৰ
সমগ্ৰ অসমবাসীৰ বাবে একবিংশ শতিকাৰ আটাইতকৈ হৃদয়বিদাৰক ঘটনাটোৱেই হ'ল অসমীয়াৰ হিয়াৰ আমঠু জুবিন গাৰ্গৰ ছিংগাপুৰত হোৱা অস্বাভাৱিক মৃত্যুৰ ঘটনা । মানি ল'ব পৰা নাছিলো তেওঁৰ আকস্মিক প্ৰস্থান । ভগৱানৰ ওচৰত প্ৰাৰ্থনা জনাইছিলোঁ খবৰটো যেন মিছা হওঁক । কিন্তু নিয়তিৰ হয়তো সেয়ে ইচ্ছা আছিল । অতি কম সময়ত সাগৰসম সংগীতৰ কৰ্মৰাজিৰে জনতাৰ অন্তৰত স্থান ল'ব পৰা এই মহান শিল্পীগৰাকীৰ মৃত্যুত সমগ্ৰ ৰাজ্যখনৰ প্ৰতিজন লোকৰ অন্তৰে কান্দি উঠিছিল । সময় যেন ৰৈ গৈছিল । অসমে যেন হৃদস্পন্দন হেৰুৱাই পেলাইছিল । বৰ্তমানো যেন প্ৰকৃতিস্থ হ'ব পৰা নাই অসমবাসী । এক বিশাল শূণ্যতাই যেন সকলোকে গ্ৰাস কৰি পেলাইছে ।কেৱল মানুহৰ ক্ষেত্ৰতে নহয় , প্ৰকৃতিৰ জীৱ-জন্তু , আকাশ-বতাহ সকলো যেন এজন অতিমানৱ হেৰুওৱাৰ বেদনাত স্তব্ধ ৷
জুবিন গাৰ্গৰ জীৱন গাঁথা এতিয়া প্ৰতিজন অসমীয়াৰ চকুৰ আগত ৷ নব্বৈৰ দশকত সংগীতৰ এক নতুন ধাৰা সৃষ্টি কৰি জনপ্ৰিয় হৈ পৰা শিল্পীগৰাকী ১৯৯২ চনত তেওঁৰ প্ৰথম এলবাম 'অনামিকা' মুক্তি পোৱাৰ লগে লগে তেওঁ পেছাদাৰী সংগীত জগতত সোমাই পৰে । এই অগতানুগতিক এলবামটো অতি কম সময়ৰ ভিতৰতে সমগ্ৰ উত্তৰ-পূৱ ভাৰতত জনপ্ৰিয়তাৰ শীৰ্ষত আৰোহণ কৰিছিল । সেই সময়ত তেওঁৰ সুৰীয়া কণ্ঠই সংগীত জগতত আলোড়নৰ সৃষ্টি কৰিছিল । তাৰ পিছত তেওঁ আৰু পিছলৈ ঘুৰি চাব লগা নহ'ল ৷ নিজৰ নামতে প্ৰায় চল্লিশটাকৈ এলবাম কৰাৰ উপৰিও ভালেকেইখন হিন্দী , বঙালী আৰু ২৪ খনতকৈ অধিক অসমীয়া চলচিত্ৰত সংগীত পৰিচালনাৰে তেওঁ সংগীত জগতত এক সুকীয়া স্থান লাভ কৰিলে । তেওঁ ৪০ টা ভাষাত ৩৮ হাজাৰৰো অধিক গীত গাইছিল । তাৰোপৰি তেওঁ একাধিক চলচ্চিত্ৰত অভিনয়ো কৰিছিল । শেহতীয়াকৈ তেওঁ কেইবাখনো চলচ্চিত্ৰ নিৰ্মাণ কৰি অসমীয়া চলচ্চিত্ৰৰ প্ৰতি ৰাইজৰ আগ্ৰহ ঘূৰাই অনাত সফল হৈছিল । এই সাধনাৰ স্বীকৃতি স্বৰূপে ভালেমান সন্মান তথা বঁটা তেওঁ অৱশ্যে জীৱনকালতে পাইছে । মৃত্যুৰ পিছতো তেওঁ অমৰত্ব লাভ কৰিলে । শেষ যাত্ৰাত অংশ লোৱা অনুৰাগীৰ সংখ্যা হিচাপত পৃথিৱীৰ ইতিহাসত চতুৰ্থ স্থান পাবলৈ সক্ষম হোৱা প্ৰাণৰ শিল্পীজন সংগীত শিল্পীৰ হিচাপত দ্বিতীয় আৰু এচিয়াৰ ভিতৰত প্ৰথম । বিশ্বৰ প্ৰায় ১১৪ খন দেশেই ইণ্টাৰনেট আৰু সামাজিক মাধ্যমত জুবিন গাৰ্গৰ বিষয়ে অধ্যয়ন আৰু আলোচনা কৰিছে ৷ সম্প্ৰতি Google য়ে তেওঁক ‘The Humming King of the World’ স্বীকৃতি দিছে । শিল্পীগৰাকীৰ ইচ্ছানুসৰি তেওঁৰ মৃত্যুত সহস্ৰজনে গোৱা ‘মায়াবিনী’ গীতটি বৰ্তমান ইংৰাজী ভাষাতো উপলব্ধ হৈছে ।
অসাধাৰণ প্ৰতিভাশালী শিল্পীজনে উত্তৰণৰ এই পৰ্য্যায় পাবলৈ যি পৰিৱেশ পাব লাগিছিল সেইখিনি সৌভাগ্যক্ৰমে তেওঁ পাইছিল বুলি নিজে উল্লেখ কৰিছে ৷ পিতৃ মেজিষ্ট্ৰেট হোৱা বাবে তেওঁ অসমৰ বিভিন্ন ঠাইৰ বিভিন্ন মানুহৰ সংস্পৰ্শলৈ আহিব পাৰিছিল । বিভিন্ন ভাষা শিকাৰ সুবিধা পাইছিল । পিতৃ এগৰাকী অধ্যয়নশীল ব্যক্তি , কবি , লেখক । মাতৃ এগৰাকী সুগায়িকা , অভিনয়শিল্পী , নৃত্যশিল্পী আছিল । মাতৃৰ ককাকৰ দিনৰে হাৰমণিয়াম এখন তেওঁৰ ষ্টুডিঅ'ত এতিয়াও থকা বুলি উল্লেখ কৰিছে ৷ মাতৃ আছিল তেওঁৰ সংগীতৰ প্ৰথম শিক্ষাগুৰু ৷ তেৱেই শিশু জুবিনক হাৰমণিয়াম , তবলা বজাবলৈ শিকাইছিল । পিছলৈ তেওঁ গুৰু ৰবীন বেনাৰ্জীৰ ওচৰত তবলা আৰু তাৰ পিছত গুৰু ৰমণী ৰায়ৰ ওচৰত সংগীত শিক্ষা গ্ৰহণ কৰিছিল । আশীৰ দশকৰ সাৰুৱা সময়ছোৱাতে প্ৰথমে তেওঁ বাদ্যযন্ত্ৰী হিচাপে আত্মপ্ৰকাশ কৰে । তাৰ পিছত যোৰহাটৰ জে বি কলেজত প্ৰথম গায়কৰূপে আত্মপ্ৰকাশ কৰা জুবিনৰ কণ্ঠৰ যাদুত সকলো মুগ্ধ হৈ পৰে ।
অভিভাৱক হিচাপে জুবিন গাৰ্গৰ পিতৃ-মাতৃৰ পুত্ৰক সহযোগ কৰাৰ যি মানসিকতা সেয়া আছিল অনন্য । মেধাৱী পুত্ৰৰ আনুষ্ঠানিক শিক্ষা অভিভাৱকে আশা কৰা মতে আগনবঢ়া সত্বেও দেউতাকৰ তেওঁৰ লগত সম্পৰ্ক আছিল বন্ধুত্বসুলভ ৷ সৰুৰে পৰা এইজন মহান পিতৃয়ে তেওঁক পাঠ্যপুথিৰ উপৰিও বাহিৰা কিতাপ অধ্যয়ন কৰি জ্ঞানৰ পৰিসৰ বহল কৰাৰ পৰিৱেশ দিছিল । বৰ্তমান সময়ত নম্বৰকেন্দ্ৰিক যি প্ৰতিযোগিতা , অভিভাৱকৰ নিজৰ সন্তানক ডাক্তৰ , ইঞ্জিনীয়াৰ হিচাপে গঢ়ি তোলাৰ যি মানসিকতা তাৰ ফলত ছাত্ৰ-ছাত্ৰীৰ মৌলিক বিকাশ বাধাগ্ৰস্ত হোৱাই নহয় , তেওঁলোকে বহুক্ষেত্ৰত দিশহাৰা হৈ নকৰিব লগীয়া কাম কৰাও পৰিলক্ষিত হৈছে । এইক্ষেত্ৰত সমাজৰ সকলো স্তৰৰ লোকৰ মানসিকতা পৰিবৰ্তনৰ লগতে চৰকাৰৰো কিছু কৰণীয় আছে । জুবিন গাৰ্গে নিজে স্নাতক ডিগ্ৰীও সম্পূৰ্ণ নকৰিলে । কিন্তু তেওঁ আছিল অধ্যয়নশীল । সকলো বিষয়ত তেওঁৰ আছিল প্ৰচুৰ জ্ঞান । ছাত্ৰ- ছাত্ৰীক বিভিন্ন কিতাপ পঢ়িবলৈ পৰামৰ্শ দিছিল । তেওঁ ঘৰতে লাইব্ৰেৰী বনাই লোৱাৰ কথা অবগত কৰিছিল । জুবিন গাৰ্গৰ প্ৰকৃতিৰ লগত আছিল নিবিড় সম্পৰ্ক । তেওঁ আছিল অসমখনক মনে প্ৰাণে ভাল পোৱা নিৰ্ভীক , স্পষ্টবাদী এক মানৱ দৰদী শিল্পী । অসাধাৰণ সৃজনীশীল প্ৰতিভাৰ গৰাকী এই শিল্পীজনাৰ কিছু কাম তৰল যেন লাগিলেও সেয়া আছিল তেওঁৰ নিজস্ব শৈলী যিবোৰৰ বাবে তেওঁ সমালোচিত হৈছিল । তথাপিও ৰজাৰ দৰে থাকি ভাল পোৱা জুবিন গাৰ্গ আছিল অসমীয়াৰ প্ৰাণৰ শিল্পী ৷ গানৰ মাধ্যমেৰে তেওঁ বহুকথাই কৈ গৈছে । তেওঁৰ অকাল মৃত্যু অসমৰ বাবে এক অপূৰণীয় ক্ষতি । এনে এক সম্পদ নিঃশেষ কৰাত জড়িত থকা ব্যক্তিসকলে উচিত শাস্তি পোৱাটো কামনা কৰো ৷ অনুভৱ কৰিছো , তেওঁ আছিল ঈশ্বৰে প্ৰেৰণ কৰা এক দেৱদূত যিয়ে তেওঁক কৰিবলৈ দিয়া কাৰ্য (Assignment) সমাপন কৰি উভতি গ'ল । জুবিন গাৰ্গে পুনৰ জনম পালে জুবিন গাৰ্গ হিচাপেই জন্ম ল'ব বিচাৰিছিল । আমিও কামনা কৰো তেওঁ জুবিন গাৰ্গ ৰূপেই পুনৰ আমাৰ মাজলৈ উভতি আহক ।
(তথ্যৰ উৎস : ইণ্টাৰনেট)
সহকাৰী শিক্ষয়িত্ৰী ,
বকো ছোৱালী হাইস্কুল
শিক্ষাখণ্ড : বকো
0 Comments