অসমীয়া কবিতা I হে মহানায়ক, তোমাক জনালোঁ শ্ৰদ্ধাঞ্জলি I কিৰণ দাস I ৬ষ্ঠ বৰ্ষ ১ম সংখ্যা

 হে মহানায়ক , তোমাক জনালোঁ শ্ৰদ্ধাঞ্জলি

সুৱদি মাত

পৰাণ জুৰুৱা 

মৌ -সনা মাত ,

হিয়াৰ আমঠু 

আই অসমীৰ হীৰা 

তুমি আমাৰ স্বাভিমান , 

আমাৰ সম্পদ 

শিৰে শিৰে তোমাৰেই গান ,

মোহাছন্ন সকলো তোমাৰেই কণ্ঠত 

নতুন প্ৰজন্মৰ 

হিয়াৰ আমঠু 

কি যাদু তোমাৰ !

লক্ষ লক্ষ জনতাৰ 

হৃদয় জিকিলা 

সাহসী , স্পষ্টবাদীতাৰ এক নিদৰ্শন 

 দৰিদ্ৰ জনৰ অনুভৱী স্বত্বা 

তুমিয়ে আমাৰ জাতিৰ অলংকাৰ 

উদাত্ত কণ্ঠে জাতি - ঊপজাতিৰ মাজত 

সমন্বয়ৰ সেতু বান্ধিলা 

অসহায় , নিছলাৰ বন্ধু আছিলা 

তুমি আমাৰ আৱেগ 

থাকিবা সদায় প্ৰতিটো 

প্ৰজন্মৰ মাজত , 

সাগৰ ভাল পোৱা তুমি 

সাগৰৰ বুকুত শুই থাকিলা 

তোমাৰ মৃত্যুত হেৰাল 

অমিয়া কণ্ঠ ,

তুমি বিহীন আমি 

আহত হৈ ৰ’লোঁ

তোমাক হেৰুৱাৰ বেদনাত 

দগ্ধ আমাৰ হিয়া 

চিৰপ্ৰবাহমান জ্যোতি তুমি 

থাকিবা সদায় আমাৰ হৃদয়ত, 

তোমাৰ আলোকেৰে 

জিলিকি থাকিব লুইতৰ পাৰ 

হে শিল্পী , প্ৰণাম তোমাক 

প্ৰণাম তোমাক ৷

কিৰণ দাস 

স্নাতকোত্তৰ শিক্ষয়িত্ৰী

ৰামদিয়া ছোৱালী উচ্চতৰ মাধ্যমিক বিদ্যালয়

শিক্ষাখণ্ড : হাজো