অসমীয়া কবিতা, শ্রদ্ধার্ঘ্য : ড° গণেশ্বৰ চহৰীয়া ছাৰৰ সমীপেষু, ৰণ্টুমণি ডেকা, ৬ষ্ঠ বছৰৰ ২য় সংখ্যা,

শ্রদ্ধার্ঘ্য : ড° গণেশ্বৰ চহৰীয়া ছাৰৰ সমীপেষু

শ্ৰদ্ধাৰ ড° গণেশ্বৰ চহৰীয়া ছাৰ,

আপুনি কেৱল এজন ব্যক্তি নহয়,

আপুনি আছিল অসমীয়া সাহিত্য, জ্ঞান

আৰু সমাজ-সচেতনতাৰ এক প্ৰোজ্জ্বল বন্তি ।

অসম সাহিত্য সভাৰ কামৰূপ জিলাৰ সভাপতিৰূপে

আপোনাৰ নেতৃত্বই দিশ দেখুৱাইছিল বহুজনক,

জ্ঞান-বিজ্ঞান সমিতি অসম,

জন শিক্ষণ সংস্থান কামৰূপ,

ৰাজ্যিক সম্পদ কেন্দ্ৰ অসম

আৰু জ্ঞানম-কামৰূপ

--- এই সকলোতে

আপোনাৰ চিন্তা, পৰিশ্ৰম আৰু দায়বদ্ধতাই 

আজিও কথা কয় নীৰবে অথচ সজোৰে ।

প্ৰথমে আপোনাক লগ পাইছিলোঁ

জ্ঞানম-কামৰূপৰ প্ৰাংগণত,

সিদিনাই অনুভৱ কৰিছিলোঁ—

আপোনাৰ কথাত আছিল গভীৰতা,

চকুত আছিল শিক্ষকসুলভ মহত্ব,

আচৰণত আছিল এক সৰল মহানতা ।

জ্ঞান বিলোৱাৰ আনন্দত

আপুনি সদায় আছিল অগ্ৰসৰ,

সমাজ গঢ়াৰ সপোন ৰচি 

আপুনি যে কেতিয়াও নহ'ল ক্লান্ত ।

আজিও আপোনাৰ শিক্ষা,

আপোনাৰ আদৰ্শ আৰু স্মৃতিয়ে

আমাক পথ দেখুৱাই যাব,

নতুন প্ৰজন্মক যোগাই যাব শক্তি ....

শান্তিত বিশ্ৰাম লওঁক, হে মহান,

আপুনি দিয়া পোহৰ কেতিয়াও নহ'ব স্তিমিত, প্ৰশমিত ।

শ্ৰদ্ধা, কৃতজ্ঞতা আৰু গভীৰ ভালপোৱাৰে

আপোনাক জনালোঁ সহস্ৰ প্ৰণাম .....

ৰণ্টুমণি ডেকা

ভিতৰখোলা মধ্য ইংৰাজী বিদ্যালয় শিক্ষাখণ্ড : কমলপুৰ