প্ৰকৃত শিক্ষা
"পাহি, তুমি কিনো এইবোৰ অদৰকাৰী ছবি আঁকি সময় নষ্ট কৰি আছা ?যোৱা কিতাপ
পঢ়াগৈ। ভালকৈ পঢ়া- শুনা কৰিলেহে ডাঙৰ হ'লে ভাল চাকৰি কৰিব পাৰিবা ;নহ'লে
দেউতাৰাৰ দৰে অৱস্থা হব।এই ক'ৰ'ণা মহামাৰীৰ দিনত লকডাউনৰ বাবে দেউতাৰাৰ
কোম্পানীৰ চাকৰি গ'ল । যাৰ বাবে দেউতাৰে এতিয়া ফুটপাথত পাচলি বেচি আমাক পোহপাল দিব
লগা হৈছে।তুমি যেতিয়া ডাঙৰ হ'বা দেউতাৰাই এনেকৈ ফুটপাথৰ দোকানী হৈ থাকিলে তোমাৰ
লাজ নালাগিবনে? গতিকে ভালকৈ পঢ়া- শুনা কৰাগৈ । এনেই সময় নষ্ট নকৰিবা যোৱা।"
মাকৰ কথা শুনি চৰকাৰী বিদ্যালয়ত চতুৰ্থ শ্ৰেণীত পঢ়ি থকা পাহিয়ে ছবিৰ কামবোৰ সামৰি সামৰি কলে- "মা তুমি এনেকৈ কিয়নো কৈছা?মোৰ দেউতা ফুটপাথৰ দোকানী বুলি মই কেতিয়াও লাজ নকৰোঁ ।কাৰণ আমাৰ স্কুলৰ ময়ুৰী বাইদেউৱে আমাক শিকাইছে যে কামৰ কোনো সৰু- বৰ নাই।আমি সকলো বৃত্তিৰ মানুহকে সন্মান কৰিব লাগে। যেনেদৰে শিক্ষক, ডাক্তৰ আদি বৃত্তি; তেনেদৰে পাচলি দোকানীও এটা বৃত্তি।গতিকে মোৰ দেউতাই কৰা কামৰ বাবে মই কেতিয়াও লাজ নকৰোঁ।তেওঁ ক'তো চুৰি-ডকাইতি কৰিবলৈ যোৱা নাই নহয় মা যে মই লাজ কৰিম ! মই মোৰ দেউতাক লৈ সদায় গৌৰৱ কৰোঁ যে মোৰ দেউতাই আমাৰ পৰিয়ালটোৰ বাবে সদায় বহুত কষ্ট কৰে আৰু কামৰ সৰু - বৰ নাভাবি সকলো কাম কৰে।"
জীয়েক পাহিৰ উত্তৰ শুনি মালবিকাৰ দুচকু সেমেকি উঠিল আৰু পাহিক সাৱটি
ধৰি ক'লে- "ইমান জ্ঞানী হ'লা তুমি পাহিমা ! তুমি ঠিকেই কৈছা। বৰ ভাল ছোৱালী
মোৰ তুমি" আৰু মালবিকাই মনতে পাহিহঁতৰ দৰে নতুন প্ৰজন্মক প্ৰকৃত
শিক্ষা প্ৰদান কৰা ময়ুৰী বাইদেউক ধন্যবাদ জনালে।
সমাপ্ত
ববিতা পাটোৱাৰী
সহ: শিক্ষয়িত্ৰী ।
মানিকপুৰ প্ৰাথমিক বিদ্যালয়।
শিক্ষাখণ্ড- ৰাণী
কামৰূপ (গ্ৰাম্য)
অলংকৰণ :- সংগীতা কাকতি
0 Comments